Foto: Reuters / İrakli Qedenidze

Tbilisidə nə baş verib: Dünən Parlamentlərarası Pravoslavlıq Assambleyasında Rusiya Kommunist Partiyasının nümayəndəsi Sergey Qavrilov Azərbaycanda səfərdə olan parlament sədri İrakli Kobaxidzenin yerində oturub. Bu, parlamentdə gürcü deputatların etirazına səbəb olub. Onlar rusiyalı nümayəndə heyətinin parlamentə buraxılmasına etiraz ediblər.

Gürcüstanın hakim “Gürcü arzusu – demokratik Gürcüstan” partiyasının liderləri baş verənləri “protokol səhvi” adlandırsa da müxalifət bununla razılaşmayıb.

Bir qrup şəxs parlament qarşısına toplaşaraq Rusiya parlamentinin nümayəndə heyətinin ölkəyə səfərinə qarşı etiraz aksiyası keçirib. Aksiyaya qoşulanların sayı getdikcə artıb və hadisə yerinə polis cəlb olunub.

Aksiyaçılar nə tələb ediblər?

Rustaveli prospektini bağlayan etirazçılar rusiyalı deputatların dərhal ölkəni tərk etmələrini istəyiblər. Aksiyada iştirak edən ictimai fəallar və müxalifət partiyalarının üzvləri Gürcüstanın parlament sədri İrakli Kobaxidzenin, daxili işlər naziri Giorgi Qaxaria və Dövlət Təhlükəsizlik Xidmətinin rəisi Vaxtanq Qomelaurinin istefasını tələb ediblər. Tələblər arasında növbədənkənar parlament seçkilərinin keçirilməsi də olub.

Hadisə yerinə kimlər gəlib?

Gürcüstanın daxili işlər naziri Georgi Qaxariya etiraz aksiyasının keçirildiyi parlamentin qarşısına gəlib. O, etirazçıları dərhal binanın önünü tərk etməyə və qanuna əməl etməyə çağırıb. Əks halda, onlara qarşı tədbirlər görüləcəyini deyib. Aksiyanın böyüdüyünü görən Georgi Qaxariya daha sonra istefaya getməyə hazır olduğunu deyib:

Belə bir ehtiyac yaranarsa, mən problemsiz istefaya gedəcəyəm

Gürcüstanın baş naziri Mamuka Baxtadze də parlament binasına gəlib.

Polisin sərt müdaxiləsi:

Aksiya iştirakçıları və polis arasında qarşıdurma yaranıb. Polis dəmir hasarları qıraraq parlament binasına daxil olmağa cəhd edən etirazçıların qarşısını alıb. Kütləvi aksiyanın dağıdılması üçün parlament yaxınlığına su şırnağı maşını cəlb olunub. Daha sonra gözyaşardıcı qaz və dəyənəklərdən istifadə edilib. Xüsusi təyinatlı dəstələr isə aksiyaçılara rezin güllələrlə atəş açıblar, xəsarət alanlar olub.

Kimlər xəsarət alıb?

Gürcüstanın keçmiş Səhiyyə naziri David Sergeyenko bildirib ki, Tibilisidəki etiraz aksiyası zamanı 70-ə yaxın insan yaralanıb, onlardan 30-u aksiya iştirakçısı, 38-i isə hüquq mühafizə orqanları işçiləridir.

Gürcüstan Baş Nazirinin müavini David Serqeenko isə xəsarət alanlar arasında jurnalistlərin də olduğunu deyib:

Aksiya zamanı “TV Pirveli”, “Rustavi 2”, “1-ci kanal” teleşirkətinin, “Kavkazskiy uzel” portalının, eləcə də “Röyters” agentliyinin əməkdaşları var

Ölkə prezidenti nə deyir:

Gürcüstan prezidenti Salome Zurabişvili ölkədəki vəziyyətlə bağlı rəsmi bəyanat yayıb. Gürcü prezident baş verənləri “Moskvanın planları” adlandırıb.

Zurabişvili müxalifəti insanları zorakılığa təhrik edən destruktiv qüvvələr adlandırıb və dövlətin də əsas vəzifəsinin ölkədə nizam-intizamı təmin etmək, qayda pozuntularına cavab vermək olduğunu bildirib.

Belarusda rəsmi səfərdə olan S.Zurabişvili baş vermiş kütləvi aksiyalara görə təcili ölkəsinə qayıtmalı olub. O səfər zamanı həm də fəxri qonaq kimi II Avropa Oyunlarının açılış mərasimində iştirak etməli idi.

Gürcüstan parlamentinin sədri İrakli Kobaxidze də bu gün Azərbaycana rəsmi səfərini dayandıraraq ölkəsinə geri qayıdıb.

  • Rusiya nümayəndə heyəti dünən Gürcüstanı tərk edib. Rusiyalı deputatlar əleyhinə aksiyalar Tbilisi ilə yanaşı, Telavi və Qoridə də keçirilib.