Etirazçılar gözlərini bağlayaraq aksiyalar zamanı polisin istifadə etdiyi rezin güllədən bir gözünü itirmiş 18 yaşlı qızla həmrəylik bildiriblər. Foto: Facebook / Vakho Kareli

Gürcüstanın paytaxtı Tbilisidə İyunun 20-də Rusiya nümayəndə heyəti əleyhinə etiraz olaraq başlayan aksiyalar 7 gündür ki davam edir.

Anadolu Agentliyi bildirir ki, ötən gün müxalifətdən olan deputat Nika Melianın iğtişaşı qızışdırmaqda ittiham edilərək toxunulmazlığının ləğv olunması etirazçıları qəzəbləndirib.

Dünənki aksiyada iştirak edənlər yenə daxili işlər naziri Georgi Qaxariyanın istefasını tələb ediblər. Onlar hökumətin aksiyaları dağıtmaq üçün həddən artıq güc tətbiq etdiyini düşünür.

Aksiya təşkilatçıları bildiriblər ki, mitinqlərdə həbs edilənlərdən indiyə qədər 300 nəfəri azadlığa buraxılıb.

Gürcülər nəyə etiraz edir: İyunun 20-də Parlamentlərarası Pravoslavlıq Assambleyasında Rusiya Kommunist Partiyasının nümayəndəsi Sergey Qavrilov Azərbaycanda səfərdə olan parlament sədri İrakli Kobaxidzenin yerində oturub. Bu, parlamentdə gürcü deputatların etirazına səbəb olub. Onlar rusiyalı nümayəndə heyətinin parlamentə buraxılmasına etiraz ediblər.
Bir qrup ictimai fəal və müxalifət partiyaların üzvü parlament qarşısında aksiya keçirib. Hadisələrlə əlaqədar olaraq Gürcüstanın parlament sədri İrakli Kobaxidze istefa verib.

Hökumətdən nə tələb olunur: Etirazçılar 3 şey tələb ediblər. Onlar aksiyalarda saxlanılan 305 iştirakçının azadlığa buraxılmasını, daxili işlər nazirinin istefasını və 2020-ci ildə parlament seçkilərinin proporsional qaydada keçirilməsini istəyiblər. Parlament seçkiləri ilə bağlı tələb artıq qəbul olunub. Həbs olunanların isə bir qismi azadlığa buraxılıb.