Özünü yandırıb öldürən Aprel qazisi ilə bağlı cinayət işi açılıb

Özünü yandıran Aprel qazisi İmamverdi İsmayılov. Foto: YeniAvaz

Mingəçevirdə həkim səhlənkarlığına etiraz olaraq intihar edən “Aprel döyüşləri” iştirakçısı İmamverdi İsmayılovla bağlı İcbari Tibbi Sığorta üzrə Dövlət Agentliyi məlumat yayıb. Qafqazinfo yazır ki, hadisənin araşdırılması üçün agentlikdə komissiya yaradılıb.

Agentliyin yaydığı məlumatda deyilir ki, mərhumun 2015-ci il təvəllüdlü övladının hərarəti yüksəldiyinə görə 26 və 27 iyun tarixlərində xəstəxanaya gətirilib. Ona tənəffüs yollarının infeksiyası diaqnozu qoyulub, Xəstəliyin stasionar müalicəyə göstərişi olmadığına görə, ilkin tibbi yardım göstərilib və lazımi məsləhətlər veriləndən sonra evə göndərilib.

İyunun 28-də saat 00:31-də uşaq 37.7 dərəcə qızdırma ilə təkrar xəstəxananın Təcili tibbi yardım şöbəsinə gətirilib, ona ilkin tibbi yardım göstərilib, yuxarıda qeyd edilən diaqnoz bir daha təsdiqlənib. Uşağın həyatına təhlükə yarada biləcək hər hansısa problem müəyyən edilməyib – məlumatda qeyd olunur.

Hadisə ilə bağlı cinayət işi açılıb və mərhumun övladına xidmət göstərən həkim Cəfərov Elxan istintaq müddətində işindən uzaqlaşdırılıb.