Nardaran məhbusu üçün imza toplanır

Vətəndaş cəmiyyəti fəalları həbsdə səhhəti pisləşən Nardaran məhbusu Əbülfəz Bünyadov üçün hazırlanan petisiyaya imza toplanır. Azadlıq radiosu yazır ki, kampaniya 2015-ci ildә Nardaran hadisәlәri zamanı hәbs olunan Əbülfəz Bünyadovun həbsdən azad edilməsi üçün başladılıb.

Ə.Bünyadov Nardarandakı əməliyyat zamanı yaralanıb və iflic olub. Yaxınları onun vәziyyәtinin kәskin pislәşdiyini, mәdә-bağırsaq problemi yarandığını bildirirlər. Məhbus Penitensiar Xidmətin müalicə müəssisəsində saxlanılır, hərəkət qabiliyyətini itirdiyindən ona digər məhbuslar qulluq edirlər.

Siyasi fəallar Bünyadovun anası Xeyriyyə Bünyadovanın prezident İlham Əliyev və birinci vitse-prezident Mehriban Əliyevaya müraciətini dəstəkləməyə çağırırlar. Məhbusun anası ölkə rəhbərliyini oğlunun ağır vəziyyətini, ailənin durumunu nəzərə alaraq azadlığa buraxılmasına yardım göstərməyə çağırır.

Nə baş verib: Əbülfəz Bünyadov iflic olmasına baxmayaraq 1 il 1 ay həbsdə saxlanılıb, 2016-cı ilin sonunda polis nəzarətinə vermə-qətimkan tədbiri ilə həbsdən buraxılıb. 2018-ci il iyulun 11-də 15 illik həbsi haqqında hökm oxunarkən məhkəmə zalında həbs edilib. Bu il iyunun 12-də Ali Məhkəmə onun sərbəst buraxmaqdan imtina edib.

Nardaran hadisələri nə söhbətdir: 2015-ci ildə Bakının Nardaran qəsəbəsində keçirilən əməliyyat zamanı «Müsəlman Birliyi» Hərəkatının sədri Taleh Bağırov, onun müavini Elçin Qasımov da daxil, təşkilatın xeyli üzvü həbs olunub. Onlar dövlət çevrilişi, terror cəhdi, qanunsuz silah saxlama və başqa maddələrlə 10 ildən 20 ilədək azadlıqdan məhrum ediliblər.

Nardaran məhbuslarının bir hissəsi prezident İlham Əliyevin martın 16-da imzaladığı əfv sərəncamı ilə azadlığa buraxılıb.