Rusiya Prezidenti Vladimir Putin bu həftənin əvvəlində yanğın baş vermiş sualtı gəminin nüvə enerjisilə işlədiyini açıqlayıb. Azadlıq Radiosu yazır ki, insidentdən üç gün sonra Kremldə keçirilən toplantıda Putin ilk dəfə gəminin nüvə enerjisilə işlədiyini deyib.
Gəminin nüvə reaktoru tamamilə təcrid olunub. Heyət reaktorun qorunması üçün gərəkən bütün addımları atıb və hazırda o, tamamilə işlək vəziyyətdədir – Şoyqu Putinə deyib. Kreml görüşün transkriptini yayıb.
Müdafiə naziri Sergey Şoyqu yanğının gəminin akkumulyator bölməsindən başlandığını deyib, ancaq yanğının səbəbini açıqlamayıb.
Nə baş verib: İyulun 1-də Rusiyaya məxsus sualtı qayıqda yanğın baş verib. Şəxsi heyət yanğını söndürsə də, 14 dənizçi ölüb. Yanğın barədə rəsmi məlumat hadisədən 1 gün sonra yayılıb. Müdafiə Nazirliyi gəminin növünü açıqlamır, amma Rusiya mediası onun böyük dərinliklərdə həssas missiyalar gerçəkləşdirən AS-12 nüvə enerjili tədqiqat sualtı gəmisi olduğunu, “Losharik” adıyla 2000-ci ildə suya buraxıldığını yazıb.
