Azərbaycanlı yazıçı Bilal Həsən Ukraynanın Odessa hava limanında saxlanılıb. Bu barədə yazıçı özü məlumat yayıb. Ötən gün hava limanında 4 saat saxlanıldığını və səbəb barədə ona heç bir məlumat verilmədiyini yazıb. Onun sənədləri əlindən alınıb və hava limanı əməkdaşları B.Həsənlə kobud rəftar ediblər. Bundan bir neçə saat sonra isə yazıçı saxlanıldığı yerlə bağlı məlumat yayıb və həmin yerin fotolarını paylaşıb:
Bax belə yerdə mən 4 gün qalmalıyam. Hətta balış, örtük istəyirəm, qəti olaraq, aqressiya göstərirlər. Deyirlər ki Azərbaycan Konsulluğu və Səfirliyi bu yeri bəyənib, razılaşıb. Get onlardan tələb elə!
Azərbaycanın Kiyev şəhərindəki konsulluğundan criminal.az saytına bildirilib ki, onlar baş verəndən xəbərdardır:
Bilal Həsənin hansı səbəbdən saxlanılması hələlik məlum deyil. Saxlanılarkən səbəb açıqlanmaya bilər. Biz Kiyevdə yerləşirik, ancaq hazırda Odessadakı Azərbaycan diasporunun nümayəndələrinə məlumat vermişik. Araşdırıb konsulluğu da məlumatlandıracaqlar. Məsələ nəzarətimizdədir.
