Nardaran hadisələri ilə əlaqədar mühakimə olunan Əbülfəz Bünyadov azadlığa buraxılıb. Bu barədə Müsəlman Birliyi Hərəkatının İdarə Heyətinin sədri Elçin Qasımov məlumat verib. Onun sözlərinə görə, bu gün Nizami Rayon Məhkəməsinin hakimi Rauf Əhmədov bu barədə qərar çıxarıb.
Onun azadlığa çıxması ilə bağlı Əbülfəz Bünyadovun vəkili Fəxrəddin Mehdiyev müraciət edib və məhkəmə Penitensiar Xidmətin Mülaicə Müəssisəsində baş tutub. Dövlət ittihamçısı ərizənin təmin olunmasına etiraz etməyib və fasilədən sonra hakim ərizənin təmin edildiyini açıqlayıb.
Nə baş verib: 2015-ci ilin noyabrında Nardaranda keçirilmiş xüsusi əməliyyat zamanı Ə.Bünyadovun aldığı güllə yarası onurğasını zədələyib. Yataq xəstəsi olmasına baxmayaraq, onu bir neçə ay həbsdə saxlayıblar. Sonradan həbs qətimkan tədbiri ev dustaqlığı ilə əvəzlənib. Lakin məhkəmə onu konstitusiya quruluşunun zorla dəyişdirilməsinə cəhd, terrorizm və s. ittihamlarla 15 il azadlıqdan məhrum edib.
