Polis maşınları. Foto: Murad Orucov / sputnik

Səhiyyə Nazirliyi Goranboydakı silahlı insidentdə yaralanan Təbriz Əmrahovla bağlı məlumat yayıb. Report yazır ki, hazırda vəziyyəti kritik olan 20 yaşlı T.Əmrahovun güllə sol göz yuvasından daxil olub və təpə nahiyəsindən keçib.

Nə baş verib: Baş Prokurorluq və Daxili İşlər Nazirliyinin yaydığı məlumata görə iyulun 12-i gecə saat 23 radələrində silahlı insident olub. Nəticədə 1-i polis olmaqla 3 nəfər yaralanıb.

Hadisə necə baş verib: Rəsmi məlumata görə, Goranboy rayonunun Goran qəsəbəsi ərazisində xidmət aparan rayon polis şöbəsinin əməliyyat müvəkkili Vüsal Kərimov avtomobil qəzasına görə bir qrup şəxsin yol kənarında toplaşdığını görüb. Səbəbini müəyyənləşdirmək məqsədilə onlara yaxınlaşıb. Bundan sonra polis əməkdaşı ilə həmin şəxslər arasında mübahisə yaranıb. Qarapirimli kənd sakini Lətif Əmrahov polis əməkdaşına qəfil zərbə endirib və onu yerə yıxıb. V.Kərimov xidməti silahdan havaya xəbərdarlıq atəşi açıb və güllə L.Əmrahovun əmisi oğlu Təbriz Əmrahova dəyib. Buna görə də Təbrizin qardaşı Pərviz Əmrahov silahı polis əməkdaşının əlindən alaraq küpü ilə onun baş nahiyəsinə çoxlu zərbə vurub.

Faktla bağlı Cinayət Məcəlləsinin 126.1 (qəsdən sağlamlığa ağır zərərvurma), 309.2 (vəzifə səlahiyyətlərini aşma) və 315.2-ci (hakimiyyət nümayəndəsinə qarşı həyat və sağlamlıq üçün təhlükəli olan zor tətbiq etmə) maddələri ilə cinayət işi başlanıb, polis və prokurorluq əməkdaşlarından ibarət istintaq-əməliyyat qrupu yaradılıb.