Gürcüstan-Azərbaycan sərhədindəki insident necə həll olunmalıdır? İzah edirik!

Ötən gün “Keşikçidağ” ətrafında növbəti gərginlik baş verib. Gürcüstan vətəndaşlarının törətdiyiinsident zamanı onların Azərvaycan sərhədçilərinin silahlarını və silahların darağını ələ keçirdikləri bildirilir.

Dövlət Sərhəd Xidməti “Keşikçi qala” sərhəd zastavasının xidməti ərazisində baş verən insidentlə bağlı məlumat yayıb. Report yazır ki, DSX-nın “Şəmkir” sərhəd dəstəsi ərazisində iyulun 14-ü saat 14:50 radələrində Gürcüstan vətəndaşları Azərbaycan sərhəd naryadına qarşı insident törədib.
Məlumatda qeyd olunur ki, təxirəsalınmaz tədbir görülüb və insident qısa müddət ərzində aradan qaldırılıb. DSX-nın şəxsi heyəti ərazidə təhlükəsizlik tədbirləri təmin edilib.

Baş verən insident əslində necə tənzimlənməlidir? Hərbi ekspert Cəsur Sümərinli izah edir.

1. Silahı Azərbaycan əsgərindən alan gürcü vətəndaşına qarşı cinayət işi açılmalı, həmin vəziyyəti sakitliklə müşahidə edən gürcü sərhədçiləri məsuliyyətə cəlb olunmalıdır (Azərbaycan tərəfi ən azından bu prosesə başlamalı, bəyanatlar verməlidir);
2. Azərbaycan Xarici İşlər Nazirliyi Gürcüstana nota göndərməlidir və bu ölkənin səfiri XİN-ə çağırılmalı, ona narahatlıqlar bildirilməlidir;
3. Azərbaycan tərəfi rəhbərlik səviyyəsində sərhəd məsələsində heç bir güzəştə getməyəcəyini açıq bəyan etməlidir;
4. Sərhəd zonası (keçid məntəqələri istisna olmaqla) mülki şəxslər üçün qapalı olmalıdır. Onların əraziyə 1 km-dən çox yaxınlaşması qadağan edilməli, yaxınlaşanlar isə cinayət məsuliyyətinə cəlb olunmalıdır. Hər iki tərəf bunu razılaşdırmalıdır. Dini məbəd və obyektlər delimitasiya bitənə qədər, gərginlik sona çatana qədər turizm üçün tam qapalı olmalıdır;
5. Azərbaycanın Gürcüstandakı səfirliyi yerli QHT-lər üçün davamlı məlumatlandırma sessiyaları, dəyirmi masalar keçirməlidir, gürcü dilində məlumatlar, kitablar dərc olunmalı və müxtəlif strukturlara paylanılmalıdır;
6. Azərbaycan və Gürcüstanın dini liderləri məsələ ilə bağlı davamlı bəyanatlar verməlidirlər;
7. DSX-nın sərhəd bölgəsindəki (Gürcüstan, Ermənistan, Rusiya sərhədlərindəki və Xəzərdəki) əsgərlərinin ən azı rus dili bilməsi vacib hesab edilməlidir…

“Keşikçidağ” gərginliyi nə məsələdir: Bu il aprelin 25-də Azərbaycan sərhədçilərinin gürcü ziyarətçilərin kompleksə ziyarətini məhdudlaşdırdığı, xarici işlər nazirliklərinin müdaxiləsindən sonra problemin yoluna qoyulduğu barədə məlumatlar yayılıb. AzadlıqRadiosunun Gürcü xidmətinin yaydığı məlumata görə, Gürcüstanda “Güc birlikdədir” antikorrupsiya hərəkatının fəalları Azərbaycanla Gürcüstan arasındakı mübahisəli ərazinin – Keşikçidağ kompleksinin bir hissəsinin keşiyini çəkməyə başlayıblar. Həmin gün – mayın 5-də hərəkat fəallarıyla yanaşı yüzlərlə sakinin də əl-ələ verərək sərhədboyu dayandığı bildirilir. “Güc birlikdədir” qurumunun rəhbəri David Katsarava yalnız bu yolla gürcü xalqının mədəni mirasını qorumağın mümkün olduğunu bildirir.