2021-ci ildən etibarən İngiltərədə 50 funtluq əskinasın üzərində riyaziyyatçı Alan Turinqin fotosu olacaq.
Riyaziyyatçının ən böyük uğurlarından biri İkinci Dünya Müharibəsi zamanı nasist Almaniyasının şifrələmə maşını – “Eniqma”nı çözməyi olub. Turinqin 1954-cü ildə intihar etdiyi ehtimal edilir.
O, ölümündən 2 il əvvəl cinsi orientasiyasına görə məhkəmə qərarı ilə hormonal müalicəyə məcbur edilib. 2013-cü ildə kraliça Elizabeta tərəfindən əfv edilib. 2017-ci ildə isə homoseksual olduğuna görə ittiham edilən kişilərin əfv edilməsini nəzərdə tutan “Turinq qanunu” qəbul edilib.
Alan Turinq həm də kompyuter elmləri və süni intellektin banisi hesab edilir.
2014-cü ildə onun həyatı və İkinci Dünya Müharibəsindəki rolu barədə “İmitasiya oyunu” adlı film çəkilib.
2019-cu ildə isə BBC Turinqi XX əsrin ən böyük şəxsiyyəti adlandırıb.
