İran deyir ki, ABŞ səhvən öz pilotsuz təyyarəsini vurub

Abbas Araqçı Foto: AP/Vahid Salemi

İran xarici işlər nazirinin müavini Abbas Araqçı Hörmüz boğazında vurulan və İrana məxsus pilotsuz təyyarə ilə bağlı ABŞ prezidentinin açıqlamasına cavab verib. “Deutsche Welle” yazır ki, İran rəsmisi ABŞ-ın səhvən öz ölkəsinə məxsus pilotsuz təyyarəni vurduğunu ehtimal edir.
O, İrana məxsus təyyarənin vurulmadığını bəyan edib. Nazir müavini bu barədə Tvitter-də açıqlama yayıb:

“Biz nə Hörmüz boğazında, nə də baş yerdə piltosuz təyyarə itirmişik”.

A.Araqçı ehtimal edir ki, ABŞ hərbi gəmisi USS Boxer səhvən Amerikaya məxsus pilotsuz təyyarəni vurub.

Nə baş verib: ABŞ prezidenti Donald Tramp ötən gün açıqlama yayıb ki, Hörmüz boğazını izləyən hərbi gəmi USS Boxer ona 1000 metrə qədər yaxınlaşan və yolunu dəyişməsi barədə dəfələrlə xəbərdarlıq edilən pilotsuz təyyarəni vurub.

Boğaz niyə önəmlidir: Hörmüz boğazı dünya dəniz ticarətində ən önəmli marşurutlarından biridir. Dünyada neft daşınmasının 5-də 1-i bu boğazdan keçir. ABŞ bu ərazidə təhlükəsizliyin təmin olunması üçün beynəlxalq koalisiya yaratmaq üçün səylər edir.