Həbsdə aclıq aksiyasına başlayan müsavatçı fəal Azad Həsənovun həyat yoldaşı Təranə Həsənovanın Ombusdmana müraciətləri cavabsız qalıb. T. Həsənova Mikroskop-a deyib ki, A.Həsənovun aclıq aksiyası keçirməsi ilə bağlı dəfələrlə Ombudsman aparatına onlayn qaydada müraciət etsə də cavab yoxdur. Qırmızı Xaç Komitəsi ilə də əlaqə saxlasa da ona cavab verən əməkdaş kobud danışıb və qəfil dəstəyi asıb.
T.Həsənovanın sözlərinə görə, neçə gündür ki, o, Azad Həsənovla əlaqə saxlaya bilmir. Onun zənglərdən imtina etdiyi deyilir. O, məhkəmədə ailə üzvlərindən görüşə gəlməməyi tələb edib.
Azad Həsənov iyulun 22-dən etibarən aclıq aksiyası keçirir. Vəkili Osman Kazımovun yaydığı məlumata görə, o, bu aksiyanı məhkəmə prosesinin uzadılmasına etiraz olaraq edir.
Həyat yoldaşınən aclıq aksiyası barədə danışan T.Həsənova həm də deyir ki, A.Həsənovun şəkəri tez-tez aşağı düşür, ona görə də onun səhhətindən narahatdır.
Nə baş verib: Azad Həsənov 2014-cü ildən Litvada mühacirət həyatı yaşayıb. Ağır xəstə olan atasını görmək məqsədilə 2018-ci ilin oktyabrında onun Bakıya gəldiyi açıqlanıb. Müdafiə tərəfinin bildirdiyinə görə, o, oktyabrın 11-də saxlanıb. Ona qarşı Cinayət Məcəlləsinin 234.4-cü (külli miqdarda qanunsuz narkotik vasitələrin dövriyyəsi) maddəsi ilə cinayət işi qaldırılıb. Barəsində həbs-qətimkan tədbiri seçilib. A.Həsənov 2003-cü ildən Müsavat Partiyasının üzvüdür.
