Emin Aslan. Foto: şəxsi arxiv / facebook

Hüquqşünas Emin Aslanın ölkədən çıxış qadağası ötən gün ləğv edilib.

Bu barədə Mikroskop-a hüquqşünas özü məlumat verib. E.Aslan iki ay öncə müxtəlif qurumlara, o cümlədən Daxili İşlər Nazirliyinə ölkədən çıxış qadağası ilə bağlı müraciətlər ünvanlayıb:

Daxili İşlər Nazirliyindən mənlə əlaqə saxladılar və rəsmi məktub verdilər ki, onlar ölkədən çıxışıma heç bir qadağa qoymayıb. Bu cavabdan sonra mən yoxlamaq üçün bilet aldım və sərhəddə dedilər ki, “stop”um yoxdur, çıxa bilərəm.

E.Aslan deyir ki, hazırda əsas məqsədi təhsilini doktorantura pilləsində davam etdirməkdir.

Nə baş verib: ABŞ-ın Sirakuz Universitetində hüquq sahəsi üzrə təhsilini yenicə başa vuran hüquqşünas Emin Aslan 2018-ci il iyunun 4-ü Bakıda mülki geyimli şəxslər tərəfindən saxlanılıb. İyunun 5-i onun Nərimanov rayon Məhkəməsində vəkilinə məlumat verilmədən məhkəmə prosesi keçirilib. Hakim ona İnzibati Xətalar Məcəlləsininin 535.1-ci (Polisin qanuni tələbinə tabe olmama) maddəsinə əsasən 30 sutka inzibati həbs cəzası verib. Həbs müddəti bitəndən sonra E.Aslanın ölkədən çıxışına qadağa qoyulub.