Demokratlar ABŞ-ın iki müxtəlif ştatında eyni gündə baş verən silahlı hücumda prezident Donald Trampı təqsirli bilir. Deutsche Welle yazır ki, bu fikirdə olanlardan biri demokratların prezidentliyə namizədi, senator Berni Sandersdir. O, Tvitter-də prezidenti tənqid edib:
Cənab prezident, irqçi, nifrət dolu və miqrasiya əleyhinə çıxışlarınızı dayandırın. Ritorikanız radikalları cəsarətləndirən şərait yaradır.
Texas ştatında 20 nəfərin ölümü ilə nəticələnən silahlı hücumdan qabaq prezident internet forumunda miqrasiya əleyhinə açıqlamalar verib. Demokratların prezidentliyə digər namizədi və senator Kori Buker də Trampı qorxu, nifrət və fanatizmi qızışdırmaqda günahlandırıb. Silahlı hücumda həlak olanların xatirəsinə matəm günü elan edən ABŞ prezidenti Donald Tramp hadisə ilə bağlı açıqlamasında deyib:
Ölkəmizdə nifrətə yer yoxdur. Bu insanlar ruhi xəstədir.
Nə baş verib: ABŞ-ın Ohayo və Texas ştatlarında 13 saat fasilə ilə iki silahlı hücum olub. Texasın El Paso şəhərindəki hücumu 21 yaşlı Petrik Krusius adlı şəxsin törətdiyi ehtimal edilir. Hadisədən sonra saxlanılan şübhəli elədiklərindən peşman olmadığını deyib.
Ohayo ştatının Deyton şəhərindəki hücumu isə 24 yaşlı bir kişi törədib. Həmin şəxs 9 nəfəri öldürəndən sonra polis onu qətlə yetirib. Barlar və restoranların çox olduğu ərazidə törədilən hücumda xeyli sayda adam yaralanıb.
