Ətraf mühiti qoruduğuna görə hər həftə 4 nəfər öldürülür və ölümlərin sayı son 15 ildə iki dəfə artıb. Independent yazır ki, bu barədə statistic rəqəmləri “Nature Sustainability” yayımlayıb. Məlumata görə, qətlə yetirilən ekoaktivistlərdən ancaq 10 faizinin qatili tapılıb.
Kvinslend Universitetindən olan aparıcı tədqiqatçı Natali Bat deyib ki, bəzi ölkələrdə qanunun aliliyi zəif olduğundan ətraf mühit mühafizəçilərinin ölümü düzgün araşdırılmır və bəzən bu ölümlərə görə məsuliyyəti elə polis və hakimlərin özləri daşıyır.
Alimlər 2002-2017-ci illərdə 50 ölkədə ümumilikdə 1558 ölümün qeydə alındığını deyir. Statistikaya görə korrupsiya reytinqinin yüksək olduğu ölkələrdə ətraf mühitlə bağlı qətllər daha çox olur. Qurbanlar müxtəlif icmalardan olan fəallar, jurnalistlər, hüquqşünaslar və QHT əməkdaşları olmaqla müxtəlif qruplardandır.
