Keçmiş prezident Almazbek Atambayev Bişkekdəki iqamətgahında jurnalistlərlə görüşür. Foto: Vladimir Pirogov/Reuters

Qırğızıstan təhlükəsizlik qüvvələri ötən gün keçmiş prezident Almazbek Atambayevi həbs etmək istəyiblər. Kloop yazır ki, A.Atambayevin tərəfdarları bu cəhdin qarşısını alıb.

Eks prezidentin tərəfdarları il təhlükəsizlik qüvvələri arasında baş verən qarşıdurmada 52 nəfər xəsarət alıb, onlardan 1-i ölüb, 2 nəfər isə reanimasiyadadır.
Atambayev bu gün paytaxt Bişkekdə yerli vaxtla saat 16.00-da (Bakı vaxtı ilə saat 18.00-da) mitinq keçirəcəyini deyib. Onun sözlərinə görə, həmin aksiyada tərəfdarları ilə görüşəcək və bu tədbirdən sonra, o, parlamentin binası qarşısında mitinq keçirməyi planlaşdırır.

Nə baş verib: Avqustun 7-i Qırğızıstan təhlükəsizlik qüvvələri keçmiş prezident Almazbek Atambayevin Koy-Taş kəndində yerləşən iqamətgahına hücum edib. Tərəfdarları ilə görüşü zamanı baş verən hücumda onlar eks prezidenti həbs etmək istəyib.

Atambayevi niyə həbs etmək istəyirlər: Keçmiş prezidentə qarşı 2011-2017-ci illərdə prezident olduğu dövrdə törətdiyi iddia olunan əməllərə görə 5 ittiham irəli sürülüb. O səlahiyyətlərindən sui-istifadədə, korrupsiyada və qanunsuz varlanmaqda ittiham olunur. Atambayev özünə qarşı bütün ittihamları rədd edir və bildirir ki, ittihamlar siyasi motivlidir. O indiyədək Daxili İşlər Nazirliyinin çağırışlarından imtina edib.

Qırğızıstan qanunlarına görə hüquq-mühafizə orqanlarının iki çağırışına cavab verməyən şəxs dindirmə üçün məcburi qaydada saxlana bilər.