ABŞ prezidenti Donald Tramp silahlı hücum baş verən Deyton və El Paso şəhərlərinə baş çəkib. Deutsche Welle yazır ki, səfərin məqsədi silahlı hücumlarda ölənlərin ailələrinə baş sağlığı vermək olub, amma hər iki şəhərdə prezident etiraz aksiyaları ilə qarşılanıb.
Çıxışlarında nifrəti qızışdırmaq və irqçiləri cəsarətləndirməkdə ittiham edilən Trampa qarşı aksiyalarda “Burada səni istəmirik”, “Tramp irqçidir”, “Onu geri qaytarın” plakatları qaldırılıb. Prezident isə bu aksiyaları “prezident statusuna hörmətsizlik” kimi qiymətləndirib. Tvitter-dəki paylaşımında Deyton səfəri barədə “isti və mükəmməl səfər. Möhtəşəm coşqu və sevgi var idi” yazıb. El Paso səfəri haqqında isə “Sizi sevirik və həmişə sizinləyik” deyə tvit paylaşıb.
Nə baş verib: Ötən həftəsonu ABŞ Texas ştatında, El Paso şəhərində alış-veriş mərkəzinə olan silahlı hücumda 22 nəfər ölüb, 26 nəfər isə yaralanıb. Həmin hadisədən 13 saat sonra daha bir silahlı hücum Ohayo ştatının Deyton şəhərində baş verib. Bu hücumda isə 9 nəfər həlak olub.
Demokratlar baş verən hücumları Trampın irqçi və miqrantlar əleyhinə ritorikası ilə əsaslandırıb.
