Araşdırmaçı jurnalist Əfqan Muxtarlı Baklıya gətirildiyi gün keçirilən məhkəmə prosesindən. Foto: Reuters

Həbsdə olan araşdırmaçı jurnalist Əfqan Muxtarlı deyir ki, həbsxanada vəziyyət gərginləşib. Həyat yoldaşı Leyla Mustafayevanın yaydığı məlumata görə, jurnalist ona qarşı təxribat ola biləcəyini ehtimal edir və o vəkili Nemət Kərimli ilə əlaqə saxlamaq istəsə də buna icazə verilməyib.
Dostunun həbsxanaya göndərdiyi 100 AZN pul da ona çatdırılmır, pulun koda düşdüyü əsas gətirilib və gələn həftə veriləcəyi deyilib.

Dediyinə görə, göndərilən pulu məhbuslara vaxtında çatdırmırlar və həbsxana daxilində dövriyyəyə buraxırlar. Elman Fəttahın “Yeni Avtoritarizm və Azərbaycan” kitabını da 2 həftədi saxlayırlar. Azərbaycanda çap olunan və qadağa qoyulmayan kitabı həbsxanaya buraxmırlar – Leyla Mustafayeva deyib.

Dostları ilə görüş qadağası hələ də qalan jurnalist indiyə qədər yalnız vəkilləri, iki qardaşı və anası ilə görüşə bilib. Ona deyilib ki, qadağaların Penitensiar Xidmətlə heç bir əlaqəsi yoxdur, Prezident Administrasiyadan göstəriş verilib.

Nə baş verib: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.