Baş nazirin müavini, YAP-ın İcra katibi Əli Əhmədov seçkilərlə bağlı Trend İnformasiya Agentliyinə müsahibə verib. Ə.Əhmədov bu il keçiriləcək Bələdiyyə və gələn il baş tutacaq Parlament Seçkiləri barədə danışıb. Mikroskop müsahibədən əsas çıxarışları təqdim edir.
1 Qəribə olan ondan ibarətdir ki, müxalifət partiyaları özlərinin uğursuzluqlarının səbəblərini Azərbaycanda keçirilən seçkilərin guya qeyri-demokratik olması ilə ört-basdır etməyə çalışırlar və bunu 5-10 il deyil, artıq 30 ilə yaxındır təkrarlayırlar.
2 Onlar özlərinin bu uğursuzluqlarının bütün səbəbini Azərbaycanda seçkilərin guya demokratik keçirilməməsində axtarırlar. Onların bəyanatları tamamilə yalandır. Azərbaycan vətəndaşı öz istəyinə uyğun səs verir, kimi istəyir, onu da seçir. Əgər müxalifət səs qazana bilmirsə, onun səbəbini çox yaxşı olardı ki, özlərinin hərəkətlərində axtarsınlar.
3 Əlbəttə, bu seçkilər bizim üçün çox ciddi növbəti sınaqdır. Biz hər bir seçkini partiyamız üçün böyük sınaq hesab edirik, ciddi şəkildə hazırlaşırıq. Artıq bələdiyyə seçkilərinə hazırlıqlara başlamışıq.
4 Yeni Azərbaycan Partiyası olaraq niyyətimiz ondan ibarətdir ki, bizim gənclərimiz çox sayda bələdiyyələrə seçilsinlər. Ona görə də biz onların namizədliklərini daha çox verəcəyik. Çünki bələdiyyələr, eyni zamanda, bir siyasi kamilləşmə məktəbidir.
5 Baxmayaraq ki, hələ növbəti parlament seçkilərinə xeyli müddət var, orada da yəqin ki, dəyişikliklər olacaq. Amma mən istəməzdim ki, biz bunu bu cür bəsit, sadə şəkildə müzakirə edək – yəni yaşın çoxdursa get, azdırsa qal.
6 Seçki elədir ki, kimə səs verəcəklərsə, o da seçiləcək. Yaşından asılı olmayaraq, vətəndaş səs verəcəksə, seçiləcək, verməyəcəksə, seçilməyəcək. Səs verərkən vətəndaş düşünə bilər ki, bu, hələ cavandır, mən buna səs verməyim, daha təcrübəliyə səs verim və yaxud düşünə bilər ki, bu artıq neçə ildir parlamentdə təmsil olunur, indi başqa adama, daha cavan insana səs verim. Bu, vətəndaşın öz seçimidir
