Beynəlxalq Bankın İdarə Heyətinin keçmiş sədri Cahangir Hacıyevin həbs cəzası 15 ildən 16 il 6 aya qaldırılıb. Report yazır ki, bu barədə Bakı Ağır Cinayətlər Məhkəməsi hökm çıxarıb. Keçmiş deputat Dünyamın Xəlilovun cəzası isə 12 il 9 aydan 14 il 6 aya qədər artırılıb. İsmayıl Hidayət-zadəyə isə 15 il 6 ay müddətinə azadlıqdan məhrum edilib.
Nə baş verib: Rəsmi məlumata görə, aparılan istintaqla 2001-2015-ci illərdə “Azərbaycan Beynəlxalq Bankı” ASC-nin İdarə Heyətinin sədri olan C.Hacıyevin göstərişləri əsasında ayrı-ayrı ölkələrdə yaradılan hüquqi şəxslərlə real dəyəri olmayan sadə veksellərin alqı-satqısına dair 3,4 milyard ABŞ dolları və 987 milyon avro məbləğində (müvafiq dövrün məzənnəsi ilə 3,8 milyard manat) müqavilələr bağlanılaraq qanunsuz veksel əməliyyatları aparılmasına dair əsaslı şübhələr müəyyən edilib.
İstintaq zamanı həmçinin ümumilikdə, 4,7 milyard manat məbləğində pul vəsaitinin mənimsəmə və digər cinayətlər yolu ilə 2,5 milyard manat hissəsini ələ keçirməklə cinayət yolu ilə əldə edilən həmin vəsaitin 2 milyard manatını leqallaşdırmasına, digər 2,2 milyard manat məbləğində pul vəsaitinin isə müxtəlif əməliyyatlara yönəltməklə banka ziyan vurmasına əsaslı şübhələr müəyyən edilib.
Bunlar necə baş verib: C.Hacıyevin tanışı Dünyamin Xəlilov, digər 20 nəfər və qeyriləri ilə birlikdə qanunsuz maliyyə əməliyyatları aparılan və real dəyəri olmayan veksellərin alınması, eləcə də təminatı olmayan kreditlərin verilməsi yolu ilə pul vəsaiti əldə edilib.
Əvvəlki hökm nə idi: Cahangir Hacıyev Bakı Ağır Cinayətlər Məhkəməsinin hökmü ilə 15 il, Dünyamin Xəlilov 13 il və İsmayıl Hidayət-zadə isə 7 il müddətinə azadlıqdan məhrum edilib. Bakı Apelyasiya Məhkəməsinin qərarı ilə D.Xəlilovun cəzası 13 ildən 12 il 9 aya, Ali Məhkəmənin qərarı ilə İ.Hidayət-zadənin cəzası 5 ilə endirilib.
