Çingiz Abdullayev Rabitə Nazirliyinə təklif edib ki, söyüş söyənlərin hesabları bloklansın

Bu gün Hüquq Müdafiə Təşkilatlarının Monitorinq Qrupunun təşkilatçılığı ilə “Sosial şəbəkələrdə söyüş, təhqir və böhtana YOX deyək” adlı dəyirmi masa keçirib. Monitorinq Qrupunda birləşən hüquq müdafiəçiləri, QHT rəhbərləri, jurnalistlər və ictimaiyyət nümayəndələri sosial şəbəkələrdə söyüşləri, təhqiri müzakirə ediblər.

Kimlər nə danışıb və nə təklif edib:

Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə deyib ki, Cinayət Məcəlləsinin 147, 148 və 148.1 maddələrinin sanksiyalarının artırılmasının vaxtıdır:

“Cinayət Məcəlləsinin 147, 148 və 148.1 maddələri mövcuddur. Lakin ölkə rəhbərliyinin humanist yanaşması nəticəsində bu maddələr bu gün tətbiq edilmir. Son vaxtlar bizə edilən müraciətlərdə ayrı-ayrı şəxslər tərəfindən qadınlar, qızlar sosial şəbəkələrdə şantaj edilir. Onların şəkilləri montaj edilərək müxtəlif görüntülərlə paylaşılır. Bunların qarşısının alınmasının zamanı çoxdan çatıb”

YouTube-dakı söyüşlü videolar

Dəyirmi masa iştirakçıları YouTube sosial şəbəkəsindəki söyüşlü videolarla bağlı bəyanat yayıblar. Bəyanatda bu halların milli-mənəvi və əxlaqi dəyərlərdən uzaq olduğu və hiddət doğurduğu vurğulanır:

Biz bu mətnə imza edənlər, respublikanın hüquq mühafizə orqanlarına müraciət edərək sosial şəbəkələrdə ölkəmizdə bərqərar olmuş ictimai-siyasi sabitliyin pozulmasına yönələn, vətəndaşlar arasında dövlətin həyata keçirdiyi tədbirlərə inamsızlıq və əhali arasında vahimə yaradan, insanları istənilən qanunazidd hərəkətlərə çağıran, o cümlədən söyüş, təhqir və böhtanlara yol verən şəxslər barəsində ciddi tədbirlərin görülməsini xahiş edirik.

Hər bir vətəndaşımızın, tələbə və gənclərimizin, xüsusi olaraq məktəblilərin təlim-tərbiyəsinə və psixologiyasına mənfi təsir göstərən bu cür halları qəti şəkildə pisləyir, istər xaricdə, istərsə də ölkə daxilində bu cür hərəkətlərə yol verən şəxsləri söyüş, təhqir və böhtanlardan əl çəkməyi, bu hərəkətləri dayandırmağı tələb edirik.

Yazıçı Çingiz Abdullayevin nazirlikdən bloklanma təklifi

Xalq yazıçısı Çingiz Abdullayev Nəqliyyat, Rabitə və Yüksək Texnologiyalar Nazirliyinə təklif edib ki, sosial şəbəkələrdə söyüş söyən istifadəçilərin hesabları bloklansın.

İngilis dilində təhqir mənalı hər hansı bir söz sosial şəbəkədə yazılırsa, həmin profil bir-üç ay müddətinə blok olunur. Bu qayda rus dilində təhqir yazan sosial şəbəkə istifadəçilərinə də tətbiq olunur. Görünür, Azərbaycan dilində olan təhqir sözləri isə nə Mark Zukerberqə, nə də digərlərinə hələ çatmayıb. Mən təklif edirəm ki, Nəqliyyat, Rabitə və Yüksək Texnologiyalar Nazirliyində Azərbaycan dilində söyüş söyənlərin bloklanması üçün müvafiq bir qrup yaradılsın. Fikrimcə, Azərbaycan dilində söyüş söyən istifadəçilər blok olunmalıdır.

Yazıçılar Birliyinin ədibləri söyənlərlə bağlı gördüyü tədbir

Ç.Abdullayev bildirib ki, Azərbaycan Yazıçılar Birliyi (AYB) şair və yazıçıları söyənləri üzvlükdən çıxarılması və onların üzvlüyə qəbul edilməməsi ilə bağlı qərar qəbul edib:

Bu gün Azərbaycanda dünyadan köçən bütün Xalq şairləri və Xalq yazıçıları söyülüb təhqir olunurlar. Səməd Vurğundan tutmuş Mikayıl Müşfiqə qədər. Sonda AYB ədibləri söyənlərin üzvlükdən çıxarılması ilə bağlı qərar qəbul etdi.