Əfqan Muxtarlı Gürcüstandan oğurlanaraq Azərbaycanda məhkəməyə gətirilərkən. Foto: Reuters

Həbsdə olan araşdırmaçı jurnalist Əfqan Muxtarlı sentyabrın 20-dən aclıq aksiyasına başladığını deyib. Aksiya ilə bağlı bəyanatında qeyd olunur ki, o, vəkili Nemət Kərimliyə qarşı edilən zorakılığa etiraz olaraq aclığa başlayıb. NİDA Vətəndaş Hərəkatının yaydığı bəyanatda deyilir:

16 saylı cəzaçəkmə müəssisəsinin rəis müavini Emin Əliyev siyasi məhbuslara qarşı qəddarlığı ilə seçilib. Bundan əvvəl siyasi məhbus Məmməd İbrahimə qarşı zorakılıq edib, məhbuslara qarşı amansız və qəddardır. Onun barəsində prokurorluğa olan şikayətlər araşdırılmır. İlham Əliyevdən tələb edirəm ki, baş vermiş hadisə obyektiv araşdırılsın. Emin Əliyev və başqa zorakılıq edən əməkdaşlar cəzalandırılmalıdır.

Jurnalist hesab edir ki, vəkili Nemət Kərimliyə edilənlər həm də Əfqan Muxtarlının hüquqlarını pozmağa yönəlib. O, indiki hücumların Avropa Şurası Parlament Assambleyasının (AŞPA) Azərbaycandakı siyasi məhbuslar üzrə məruzəçisi Torhildur Sunna Evarsdottir və ATƏT-in Media Azadlığı üzrə nümayəndəsi Dunya Myatoviç ilə görüşündən sonra baş verdiyini deyir.

Əfqan Muxtarlı kimdir: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.