İngiltərənin səyahət şirkəti “Thomas Cook” iflasa uğradığını açıqlayıb. Deutsche Welle yazır ki, şirkətin xilası üçün lazım olan 200 milyon funt tapılmayıb və bu gün şirkət Ali Məhkəməyə iflasla bağlı müraciət edib. Nəticədə şirkətin 600 min müştərisinin rezervasiyası ləğv edilib. İngiltərə hökuməti ölkə xaricində qalan və şirkətin iflasına görə geri qayıda bilməyən 150 min vətəndaşın geri qaytarılması üçün fəaliyyətə başlayıb. Geri dönüş əməliyyatının 2 həftə davam edəcəyi ehtimal edilir.
Şirkət niyə iflasa uğrayıb: 178 ildir fəaliyyət göstərən “Thomas Cook” bir müddət əvvəl Brexit qeyri-müəyyənliyinə görə, rezervasiyalarda ləngimə olduğunu və bu vəziyyətə görə borcun artdığını bəyan edib.
“Thomas Cook”un CEO-su Peter Fankhauser şirkətin xilası üçün borcverənlər və səhmdarlarla həftəsonu baş tutan görüşlərin heç bir nəticə vermədiyini açıqlayıb.
Növbəti aylar üçün edilən 1 milyona yaxın rezervasiya ləğv ediləcək, amma sığorta olunduğundan ödənişlər geri qaytarılacaq.
