Əfqan Muxtarlı. Foto: Elmir Mirzoyev

Həbsdə aclıq aksiyası keçirən araşdırmaçı jurnalist Əfqan Muxtarlı “kars”a salınıb. İki gündür ki, dərmanlarını da qəbul etməkdən imtina edən jurnalist şəkərli diabet xəstəsidir.
Onun “kars”a salınması ilə bağlı məlumatı Samir Əsədli yayıb.

Penitensiar Xidmət nə deyir: Penitensiar Xidmətin ictimaiyyətlə əlaqələr şöbəsinin rəisi Mehman Sadıqov APA-ya açıqlamasında jurnalistin aclıq aksiyasına başladığını və digər məhbuslardan təcrid edildiyini təsdiqləyib: “O, bu gündən aclığa başlayıb. Əfqan Muxtarlı digər məhkumlardan təcrid edilib. Hazırda səhhətində problem yoxdur. Həkim nəzarətindədir”.

Nə baş verib: Jurnalist Əfqan Muxtarlı vəkili Nemət Kərimliyə qarşı olan zorakılıq və 16 saylı cəzaçəkmə müəssisəsinin rəis müavinin məhbuslara davranışına etiraz olaraq iki gün əvvəl aclıq aksiyasına başlayıb. O, ölkə başçısından həmin hadisələrin obyektiv araşdırılmasını tələb edir.

Əfqan Muxtarlı kimdir: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.