Gürcüstanın paytaxtı Tbilisidə Əfqan Muxtarlıya dəstək üçün keçirilən aksiya. Foto:Reuters

“Sərhədsiz Reportyorlar” təşkilatı (RSF) həbsdə aclıq aksiyası keçirən jurnalist Əfqan Muxtarlı ilə bağlı bəyanat yayıb. Təşkilatın bəyanatında deyil ki, onlar şəkərli diabet xəstəsi olan Ə.Muxtarlıya görə narahatdır:

Jurnalistin taleyinə görə məsuliyyəti Azərbaycan hökuməti daşıyır və RSF beynəlxalq ictimaiyyəti onun dərhal azadlığa buraxılması üçün təzyiq göstərməyə çağırır. Tanınmış araşdırmaçı jurnalist böyük təhlükə altındadır, çünki o, şəkərli diabet və yüksək təzyiq xəstəliklərindən əziyyət çəkməyinə baxmayaraq aclıq aksiyasına başlayıb.

Nə baş verib: Jurnalist Əfqan Muxtarlı vəkili Nemət Kərimliyə qarşı olan zorakılıq və 16 saylı cəzaçəkmə müəssisəsinin rəis müavinin məhbuslara davranışına etiraz olaraq sentybarın 22-i aclıq aksiyasına başlayıb. O, ölkə başçısından həmin hadisələrin obyektiv araşdırılmasını tələb edir.

Əfqan Muxtarlı kimdir: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.