Əfqan Muxtarlı Nemət Kərimli. Foto: Elmir Mirzoyev, Kəmalə Bəhlulova.

Əfqan Muxtarlı xanımı Leyla Mustafayevaya zəng edərək aclıq aksiyasını dayandırma səbəblərini və vəkili Nemət Kərimliyə qarşı olan təzyiqlərin araşdırılması ilə bağlı tələblərini çatdırıb.

Jurnalist aclıq aksiyasının 3-cü günü gözündə kəskin ağrıların başladığını və aksiyanı dayandırmaq məcburiyyətində qaldığını bildib. Leyla Mustafayeva deyir ki, Ə. Muxtarlının ağrıları hələ də keçməyib və təcili müayinəyə ehtiyacı var.

Əfqan Muxtarlı hesab edir ki, Nemət Kərimliyə təzyiqlərlə bağlı işin araşdırılmasını Ədliyyə Nazirliyi üzərinə götürməlidir. Araşdırmalar yekunlaşanadək 16 saylı CÇM-nin rəisi Şəfayət Abbasov və Emin Eminəliyev vəzifəsindən uzaqlaşdırılmalıdır. Çünki həbsxanada işləyən məhbuslardan məcburi şəkildə Nemət Kərimliyə qarşı ifadə alırlar. Məhbuslardan ancaq biri ifadəni imzalamaqdan imtina edib.

Əfqan Muxtarlı hesab edir ki, Vəkillər Kollegiyası və Penitensiar Xidmət Nemət Kərimli ilə bağlı əvvəlcədən planlaşdırılmış təxribat hazırlayıblar. Məqsəd Nemət Kərimlini Vəkillər Kollegiyasından və onun müdafiəsindən uzaqlaşdırmaqdır.

Jurnalist deyib ki, Nemət Kərimliyə qarşı özbaşınalıqlara son qoyulmasa, yenidən aclıq aksiyasına başlayacaq və bu dəfə aclıq aksiyasına başqa məhbuslar da qoşulacaq.