“Müsəlman Birliyi” Hərəkatının həbsdə olan sədri Taleh Bağırovun xanımı Leyla İsmayılzadə haqqında cinayət işi başlanıb. Cinayət işi Qobustan həbsxanasına – Taleh Bağırovun yanına telefon keçirmək cəhdi ilə bağlıdır. Hüquq-mühafizə orqanlarından AzadlıqRadiosuna verilən məlumatda deyilir:
Uzun müddət Ədliyyə Nazirliyinin istintaq idarəsində araşdırmalar getdi. Ekspertiza təyin edildi və rəy alındı. Yekunda belə nəticəyə gəliblər ki, Leyla İsmayılzadənin əməlində cinayət tərkibi var. İşin istintaqı da həmin idarədə aparılır. Artıq istintaq yekunlaşmaq üzrədir və yaxın günlərdə Cinayət Məcəlləsinin 317-1 (cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların verilməsi və ya ötürülməsi) ittiham elan edib, iş məhkəməyə göndəriləcək.
Leyla İsmayılzadə nə deyir: Leyla İsmayılzadə istintaqın gedişi və ona ittiham verilməsindən xəbərsizdir. Amma müstəntiq onunla əlaqə saxlayıb və sentyabrın 27-də Ədliyyə Nazirliyinin istintaq idarəsinə çağırıb. O, sözügedən məsələ ilə əlaqədar bundan öncə də iki dəfə dindirilib.
Söhbət hansı hadisədən gedir: Penitensiar Xidmət martın 21-də Leyla İsmayılzadə haqda məlumat yayıb. Məlumatda bildirilib ki, o üç azyaşlı övladı ilə birlikdə həyat yoldaşının yanına gələndə mobil telefon və danışıq kartı gətirib. Leyla İsmayılzadə isə qayınatasına məxsus sözügedən telefonun işlək olmadığını, uşağın ondan oyuncaq kimi istifadə etdiyini və həbsxanaya məqsədli şəkildə gətirilmədiyini bildirib.
Leyla İsmayılzadə hesab edir ki, həyat yoldaşına təzyiq məqsədilə bu olayı şişirdiblər.
Nə qədər cəza gözləyir: Cinayət Məcəlləsinin 317-1.1 maddəsində 1000 manatdan 2000 manata qədər cərimə və ya iki ilədək islah işləri, yaxud da iki ilə qədər azadlıqdan məhrumetmə cəzası nəzərdə tutulub.
