İran xüsusi xidmət orqanları qadın hüquqları fəalı, “Ağ çərşənbələr” hərəkatının əsasını qoyan Məsih Əlinejadın qardaşını həbs edib. Deutsche Welle yazır ki, ABŞ-da yaşayan və İrandakı hicab məcburiyyətinə etiraz edən M. Əlinejad 45 yaşlı qardaşının ona təzyiq etmək üçün həbs edildiyini deyir:
Mənim qardaşımın evində yoxlama aparılıb və onun əlləri qandallanıb, gözləri bağlanıb. O, iki balaca uşağının gözü önündə həbs edilib. Qardaşım heç bir siyasi fəaliyyətlə məşğul olmayıb, amma indi onun cinayəti mənim hicab əleyhinə fəaliyyətimdir.
ABŞ-da yaşayan fəal deyir ki, bu, İran hökumətinin fəalları susdurmaq üçün atdığı tipik addımlardandır.
Stalin də belə edərdi. Hər hansı diktator da öz vətəndaşına qarşı belə davranardı. İslam Respublikasının məqsədi məni susdurmaqdır. Amma mən girov götürənlərin əleyhinə daha ucadan danışacam.
Ağ çərşənbələr nədir: 2013-cü ildə başlayan hərəkat İrandakı hicab məcburiyyətinə etira edir və etiraz əlaməti olaraq hər həftənin çərşənbə günü ağ geyinməyi nəzərdə tutur. İndiyə qədər minlərlə qadının qatıldığı bu hərəkat həm də həbslərə səbəb olub. 2017-ci ilin dekabrından 2018-ci ilin mayına qədər təkcə paytaxt Tehranda buna görə 35 qadın həbs olunub.
Məsih Əlinejad kimdir: Qadın hüquqları fəalı 2009-cu ildən etibarən AB-da yaşayır. Həbs təhlükəsi olduğuna görə ölkəsi İrana gedə bilmir və valideynlərinin də ölkədən çıxışına qadağa var. Atası onunla danışmır və Məsih hesab edir ki, bunun səbəbi dövlət agentlərinin onu yoldan çıxarmağıdır.
