Qarabağ qaziləri ilə SOCAR əməkdaşları arasında nə baş verir?

Bir neçə gün əvvəl bir qrup Qarabağ əlili ilə polis əməkdaşları arasında olduğu deyilən video yayılıb və polisin əlilləri döydüyü iddia olunub. Sonradan məlum oldu ki, qarşıdurma əlillərlə Azərbaycan Dövlət Neft Şirkətinin (SOCAR) Təhlükəsizlik İdarəsinin əməkdaşları arasında baş verib. Neft şirkəti əməkdaşları ərazidə tikilməkdə olan evin qanunsuz olduğunu deyib və bu, qarşıdurmaya səbəb olub. Binəqədi rayonu Biləcəri qəsəbəsində sentyabrın 28-də baş verən insident bu gün də təkrarlanıb. Qarabağ əlillərinin sözlərinə görə onlar yolla getdikləri halda maşınla gələn bir qrup SOCAR əməkdaşı onlara hücum çəkib.

Zərəçəkən Qarabağ qaziləri. Foto: screenshot

Bugünkü insident necə baş verib: Bu gün baş verən qarşıdurmada hadisəni işıqlandıran media işçiləri də xəsarət alıb. Fiziki təzyiqə məruz qalan Qarabağ qazilərindən biri Arif Rəhimov AzadlıqRadiosuna deyib:

Bu gün, sentyabrın 30-da yolla gedirdik. Bir neçə maşınla gəlib, əllərində lom, armatur, “montirovka” ilə düşdülər. Bəzilərinin əyinidə üzərində SOCAR yazılmış paltar var idi, çoxusu isə mülki geyimli idilər. Düşən kimi bizə hücum edib, döydülər. İki nəfər üçün Təcili tibbi yardım gəldi. Mənim özümüm alnımı partlatdılar. Polis müdaxilə etməsəydi, vəziyyətimiz daha ağır olcaqdı. Birinci qrup əliləm, Qarabağ qazisiyəm, bizi niyə döyürlər?.

İnsidentdə xəsarət alan əlillərdən Kənan Bayramov Meydan TV-yə deyib ki, sentyabrın 28-də baş verən qarşıdurma zamanı SOCAR əməkdaşları tikilinin qanunsuz olduğunu deyib.

Bir Qarabağ əlili bələdiyyədən sənədlə 2,5 sot torpaq sahəsi alıb və orada ev tikmək istəyib. Neft şirkətinin işçiləri isə ondan bunun üçün 2 min AZN pul tələb edib. Amma sonradan deyiblər ki, 5 min AZN də versin. Biz etiraz etdik, dedik ki, əlil adamlarıq, imkanımız yoxdur. Cavabları belə oldu:”Bizə görə əlil olmamısız ki…”. Bu gün baş verənlər isə gözlənilmədən oldu, yolda getdiyimiz yerdə saxlayıb, hücum çəkdilər.

İcra hakimiyyəti ilə görüş nə nəticə verib: Bu günkü hadisədən sonra Qarabağ qaziləri ilə Binəqədi Rayon İcra Hakimiyyətin başçısı Elxan Allahverdiyev və Binəqədi Rayon Polis İdarəsinin rəisi Musa Musayev görüşüb. Onlar tələb edib ki, əlillər izahat yazsın və problemləri ilə məşğul olacaqlarına söz veriblər.

SOCAR nə deyir: Dövlət Neft Şirkəti də hadisə ilə bağlı açıqlama yayıb. Açıqlamada deyilir ki, sentyabrın 27-də saat 12:00-da şirkətin Təhlükəsizlik İdarəsinin mühafizə etdiyi Neft Kəmərləri İdarəsinə məxsus Şirvan-Böyükşor neft kəməri ərazisinin və həmin kəmərə birləşən Binəqədi xəttinin mühafizə zolağının bir hissəsinin zəbt olunduğu, qanunsuz tikili üçün bünovrə işlərinin aparıldığı aşkarlanıb. Xəbərdarlıqdan sonra tikinti işləri dayandırılıb. Növbəti gün yoxlama aparılanda tikintinin davam etdirildiyi aşkar olunub və növbəti dəfə xəbərdarlıq edilib. Məlumatda deyilir:

Həmin vaxt qanunsuz tikinti aparan şəxsin təhriki ilə əraziyə toplaşmış, özlərini Qarabağ müharibəsi əlilləri kimi təqdim edən bir qrup şəxs mühafizə komandasının əməkdaşlarını təhqir edərək, onlara hücum çəkiblər. SOCAR-ın mühafizəçiləri hücum edən şəxslərə qarşı heç bir zorakılıq tətbiq etmədən hadisə yerinə polis əməkdaşlarını çağırıblar.

SOCAR deyir ki, hadisə nəticəsində onların 3 əməkdaşı müxtəlif bədən xəsarətləri alıb.