Deputat vəsiqəsini girov qoymaqda ittiham olunan millət vəkili Rafael Cəbrayılov mandatından imtina etməklə bağlı Parlamentə müraciət edib. APA yazır ki, o, həm seçicilərindən, həm Azərbaycan cəmiyyətindən üzr istəyərək istefa vermək qərarına gəlib.
Milli Məclisin payız sessiyasının bu gün keçirilən ilk iclasında spiker Oqtay Əsədov Milli Məclis Aparatının rəhbəri Səfa Mirzəyevə bununla bağlı tapşırıq verib. O, S. Mirzəyevə tapşırıb ki, sənədlər qanunvericiliyin tələblərinə uyğun hazırlanaraq Mərkəzi Seçki Komissiyasına göndərilsin.
Mandat necə ləğv edilir: Hüquq siyasəti və dövlət quruculuğu komitəsinin sədri Əli Hüseynli deyir ki, Konstitusiyada mandatın ləğv olunması 89-cu maddənin 5-ci bəndində nəzərdə tutulub: “Bu məsələ ilə bağlı Milli Məclis hər hansı qərar qəbul etmir. Protokol qaydasında müraciət Mərkəzi Seçki Komissiyasına göndərilir. Seçki Məcəlləsinin 175-ci maddəsinə uyğun Mərkəzi Seçki Komissiyası deputatın mandatından məhrum edilməsi barədə qərar qəbul edir”.
Nə baş verib: Millət vəkili Rafael Cəbrayılov Təranə Fətəliyeva adlı vətəndaşdan ev tikmək üçün notariat qaydasında təsdiq olunmuş şəkildə 300 min ABŞ dolları məbləğində borc alıb. Lakin borcu vəd etdiyi vaxta qaytarmadığı üçün zəmanət kimi III və IV çağırış Milli Məclisinin deputatının vəsiqəsinin əslini girov qoyub. R. Cəbrayılov T. Fətəliyevadan başqa Xatirə Nəcəfova adlı daha bir qadından da borc alıb.
