Şəki və Qax rayonlarındakı çaylaq və düzən ərazilərdə yerləşən yüzlərlə hektar meşə və kolluqlar bağ salınması məqsədilə kürünür. Ecofrontun əldə etdiyi son məlumata görə, artıq Cunud- Baş Layısqı yaxınlığında 1500 hektara yaxın ərazinin kürünməsinə razılıq verilib.
“Bu ərazilər zəngin meşəlik və kolluqlardır. Peyk görüntlüləri hələ ki, qırıntıları qeydə almayıb. Amma yerli sakinlərin dediyinə görə artıq kürümə işləri başlayıb. Əgər vaxtında qarşısını ala bilməsək bu meşəliklər və biomüxtəliflik monoton bağlarla əvəz olunacaq tonlarla kimyəvi dərmanlar gübrələr çaylara axıdılacaq, sel daşqınlarının fəsadları artacaq” – məlumatda deyilir.
Ecofrontun bundan əvvəl yaydığı məlumatda isə deyilir ki, yerli əhali bu qırıntıların arxasında prezident ailəsinin dayandığını qeyd edir.
“ETSN və yerli meşə idarələrinin çarəsizliyinin səbəbi də budur. Ekologiya və Təbii Sərvətlər Nazirliyindən açıqlama verməsini və bu dağıdıcı layihələri dərhal dayandırmaq üçün öz işi ilə məşğul olmasını tələb edirik”.
