Azərbaycan Xalq Cəbhəsi Partiyasının (AXCP) həbsdə olan fəalı Fuad Əhmədlinin səhhəti pisləşib. O, Penitensiar Xidmətin xəstəxanasına köçürülüb.
Fəalın atası Zəfər Əhmədli Meydan TV-yə deyib ki, oğlu ağciyər və böyrəyindən əziyyət çəkir:
Oğlum həbsdən əvvəl əməliyyat olunub, bu xəstəliklə qapalı yerdə qala bilməz, Ali Məhkəmədə proses zamanı 1 ay Kürdəxanıda qaldı, ordan qayıdandan sonra vəziyyəti pisləşmişdi, nəfəs ala bilmirdi. İkinci problem böyrək ağrılarıdır. Görüş zamanı rəisə dedim ki, heç olmasa müayinədən keçirsinlər, vəziyyəti yaxşı deyil. Oktyabrın 5-də həbsxanadan zəng etdilər ki, artıq xəstəxanaya aparıblar.
Fuad Əhmədli kimdir: AXCP üzvü Fuad Əhmədli 2016-ci ilin avqustunda “Əməliyyat- axtarış fəaliyyəti haqqında qanun”un pozulması və “Azerfon” mobil telefon istifadəçilərinin şəxsi məlumatlarının yayılması ittihamı ilə həbs edilib. Bundan əlavə, o, vəzifə səlahiyyətini aşmaqda ittiham olunub. 2017-ci il iyunun 16-da 4 il azadlıqdan məhrum edilib. Sonradan Apellyasiya Məhkəməsi və Ali Məhkəmə hökmü qüvvədə saxlayıblar.
2019-cu ilin mayında Suraxanı Rayon Məhkəməsi F.Əhmədlinin cəzasının yarıdan çoxunu çəkməsilə əlaqədar şərti olaraq vaxtından əvvəl azadlığa buraxılması barədə müraciətini təmin etməyib. Bakı Apellyasiya Məhkəməsi iyulun 5-də onun vaxtından əvvəl şərti azadlığa buraxılmasından imtina ilə bağlı şikayətinə baxılıb və təmin edilməyib.
Partiya Fuad Əhmədlinin həbsinin onun siyasi fəaliyyəti ilə bağlı olduğunu deyib. Onun həbs müddəti 10 ay sonra bitəcək.
