Azərbaycanda bu ilin Yanvar-Sentyabr ayları ərzində ümumilikdə 118 qadın ailədaxili şiddətə məruz qalıb. Onlardan 33-ü həmin şiddət nəticəsində dünyasını dəyişib. Digər 85 qadın isə ailə üzvü və yaxınları tərəfindən ya döyülüb, bıçaqla, balta ilə, küt alətlə, çəkiclə vurulub, yandırılıb və müxtəlif cür xəsarət alıblar.
Mikroskop Media bu monitorinqi Azərbaycanda informasiya agentlikləri və xəbər saytlarında dərc olunan materiallara əsasən aparıb. Əsas istifadə olunan iki mənbə APA və Report informaisya agentlikləri olub.
Mediada dərc olunan cinayət hadisələrinin ancaq bir qisminin təfərrüatları barədə məlumatlar olur. Ona görə də şiddət göstərənlərin heç də hamısının bunu hansı bəhanə ilə etdikləri dəqiq məlum deyil. Digərlərinin isə böyük əksəriyyəti bunu qısqanclıq, ailədaxili münaqişə, qadının boşanmaq istədiyinə görə və s. olub. Təkcə ailədaxili münaqişə zəmnində qeydə alınan döyülmə, xəsarət və cinayət faktının sayı 20-dən çoxdur.
Bu fiziki zorakılığın çox böyük əksəriyyətini qadınların əri, qaynı, qaynatası, qardaşı, qaynı, keçmiş əri, kürəkəni, oğlu olan kişilər, bir qismini isə digər ailə üzvləri qaynana, qız, gəlin törədib.
Baş verən cinayətlərin bir qismi xüsusi amansızlıqla yerinə yetirilib. Bunların arasında uşaqların gözü qarşısında öldürülən anaları misal çəkmək olar. Təəssüf ki, bir neçə gün əvvəl 20 bıçaq zərbəsi alıb qətlə yetirilən Leyla Abdullayeva ilk belə qətl deyil. Ondan öncə də qadınlar 4-5 bıçaq zərbəsindən tutmuş 18-19 dəfəyə qədər bıçaqlanıb və onların bir qismi ölüb.
Döyülən qadınların arasında şərlənməklə hədələnənləri olub ki, məsələn, onlarından birinin həyat yoldaşı polisə şikayət edəcəyi təqdirdə onu başqa kişi ilə tutduğunu deməklə hədələyib.
Qadınlar təkcə yumruq, sillənin, bıçaq zərbəsinin yox, balta, küt alət, çəkic altında əzilib, maşınla divara sıxılaraq öldürülüb, yaşadıqları evə od vurularaq yandırılıb.
Monitorinqin nəticəsində görə, şiddət hadisələri ən çox Bakı, Sumqayıt, Gəncə, Şəmkir, Cəlilabadda olub. Amma bir də qeyd etmək mütləqdir ki, bu, yalnız mediada dərc olunan məlumatlara əsasən müəyyən olunmuş nəticədir, rəsmi statistika deyil.
