Fuad Qəhrəmanlı. Foto: Azadlıq

Azərbaycan Xalq Cəbhəsi Partiyasının sədr müavini Fuad Qəhrəmanlıya ailə üzvləri Selcan, Sənay və Zümrüd Yağmura qarşı zorakılıq törətməkdə ittiham olunaraq cinayət işi açılıb.

Report-un məlumatına görə, prokurorluq Selcan Yağmurun sosial şəbəkədə yazdığı status və Zümrüd Yağmurun müsahibəsini əsas götürüb.

O, “YouTube”da yerləşdirilən müsahibəsində əri Fuad Qəhrəmanlının 2010-cu ildə ağır şüşə stəkanla azyaşlı qızı Sənayın dizini sındırdığını, 2013-cü ilin yayında onun barmağını sındırdığını, 2015-ci ilin noyabrında isə ona digər xəsarətlər yetirdiyini, azadlıqda, hətta həbsdə olarkən belə onlara qarşı psixi iztirablar verdiyini bildirib.

Prokurorluq araşdırma zamanı Bakı şəhəri Kliniki Tibbi Mərkəzin qeydiyyat jurnallarına baxış keçirib. Bundan sonra müəyyən edilib ki, Sənay Yağmur 6 yaşı olanda, 2010-cu ilin yanvarında sağ diz nahiyyəsində travmatik çat (natamam sınıq), travmatik zədə yerində su yığılması və şişkinliklə bağlı müayinə və müalicə olunub, ona tibbi yardım göstərilib. 2018-ci ilin sentyabrında sağ dizinin müayinəsi üçün yenidən müraciət edib.

Baş Prokurorluq Cinayət Məcəlləsinin 2 maddəsinə əsasən cinayət işi açıb:

  • 133.2.1 (iki və ya daha çox şəxsə qarşı döyməklə və ya sair zorakı hərəkətlərlə güclü fiziki ağrı və ya psixi iztirablar vermə)

  • 133.2.4-cü (təqsirkar şəxs üçün aşkar surətdə yetkinlik yaşına çatmayan, habelə köməksiz vəziyyətdə olan şəxsə qarşı döyməklə və ya sair zorakı hərəkətlərlə güclü fiziki ağrı və ya psixi iztirablar vermə)

Bu ittihamlar sübuta yetiriləcəyi təqdirdə Fuad Qəhrəmanlını 2 ildən 7 ilə qədər həbs cəzası gözləyir.