Bakı Şəhər Baş Polis İdarəsi (BŞBPİ) bu gün Milli Şura və AXCP-nin keçirmək istədiyi mitinqlə bağlı məlumat yayıb. APA yazır ki, BŞBPİ İctimai Təhlükəsizlik İdarəsinin rəisi, polis polkovniki Nurullah Məmmədxanlının yaydığı məlumata görə, saxlanılanlar var:
Metronun mühafizə zonasına daxil olan heç bir yerdə heç bir aksiya keçirilə bilməz. Saxlanılanlar var, onların haqqında da tədbir görüləcək. Onlar təxribat törətmək məqsədilə ictimai asayişi pozmağa cəhd etdilər, qarşıları da qətiyyətlə alındı. Hesab edirəm ki, mitinq keçirmək istəyirlərsə, onlar üçün çox yaxşı, münasib yer ayrılmışdı.
Nə baş verib: Bir neçə gün əvvəl Milli Şura və AXCP 19 oktyabrda “28 May” metrosu qarşısında aksiya keçiriləcəyini bəyan edib. Bakı Şəhər İcra Hakimiyyəti ilə razılaşdırılmayan aksiyadan əvvəl həmin əraziyə gedən yollar bağlanıb. Aksiya ilə əlaqədar 3 metro stansiyası – “28 may”, “Cəfər Cabbarlı” və “Xətai” fəaliyyətini müvəqqəti dayandırıb. Eləcə də ərazidə internetin kəsildiyi barədə məlumat yayılıb. Mitinqdə iştirak etmək istəyən AXCP sədri Əli Kərimli və onu müşayiət edən bir neçə nəfər evindən çıxanda saxlanılıb.
