19 Oktyabrda AXCP və Milli Şura “28 May” metrosu yaxınlığında razılaşdırılmamış aksiya keçirib. Aksiya metronun qarşısında planlaşdırılsa da bir neçə saat əvvəldən ərazidə polis postları quruldu və heç kim ora buraxılmayıb. Polis zorakılığı ilə müşayiət olunan aksiyada AXCP sədri Əli Kərimli saxlanıldı. Elə avtobusdaca döyüldüyünü deyən Əli Kərimlinin aldığı zərbələrə görə başında hazırda 9 tikiş var. Tofiq Yaqublu da həmin gün saxlanılıb və 15 sutka inzibati həbs edilib.
ABŞ-ın Azərbaycandakı səfirliyi aksiyadakı polis zorakılığını pisləyən bəyanat yayıb və həmin polislərin cəzalanmasına çağırış edib.
Hakim partiyanın nümayəndələri və Milli Məclisin deputatları isə polis zorakılığını inkar edir. Bu gün Milli Məclisin plenar iclasında mitinqlə bağlı səslənən fikirləri bir yerə toplamışıq.
Vitse-spiker Bahar Muradova: “Qanundan kənar, qanuna zidd fəaliyyət həyata keçirmək istədilər. Müəyyən sosial narazılıqları olan təbəqələri də bura cəlb etmək istəyiblər. Arxasında erməni maliyyəsi dayanan, Ermənistanın, erməniçiliyin maraqlarına xidmət edənlərin sifarişini yerinə yetirən insanların iştirakı ilə aksiya keçirmək istədilər. Bunların özü çox şey deyir. Məqsəd Azərbaycandakı islahatları dayandırmaq, dövləti sarsıtmaq idi”
Deputat Tahir Kərimli: “Qanunvericiliyə əsasən, metrostansiyanın mühafizə zonasında mitinq keçirilməsi qadağandır. Guya orada Yeni Azərbaycan Partiyası istəsə, mitinq keçirə bilər? Əlbəttə, yox, çünki orada mitinq keçirmək qadağandır. Görünür, bunlar xaricdən dəstək alırlar…”
İctimai birliklər və dini qurumlar komitəsinin sədri Siyavuş Novruzov: “Oktyabrın 19-da Bakının mərkəzində mitinqə cəhd olub. Bu, qeyri-qanuni addımdır. Bir qrup Azərbaycanı istəməyən, xalqın, dövlətin əleyhinə erməni lobbisi ilə əlbir olanlar ölkəmizdə sabitliyi pozmağa cəhd etdilər, xalq-iqtidar birliyinə xələl gətirməyə çalışdılar”.
Birinci vitse-spikeri Ziyafət Əsgərov: “Onlar qəsdən belə hərəkətlər edirlər ki, iğtişaşlar olsun, qarışıqlıq yaransın. 1992-ci ildə mülki və siyasi hüquqlar haqqında paktı Əbulfəz Elçibəy imzalamışdı. Həmin aktda da sərbəst toplaşmaq haqqında bütün müddəalar yer alıb. Əli Kərimli vaxtilə Elçibəyə necə xəyanət edibsə, bu gün də dövlətə xəyanət edir”.
Deputat Səməd Seyidov: “Bir neçə gün sonra ən mühüm beynəlxalq təşkilatlardan biri olan Qoşulmama Hərəkatının Azərbaycanda zirvə toplantısı keçiriləcək. Həmin qüvvələr, eyni zamanda Azərbaycan-Amerika münasibətlərinə xələl gətirmək istəyirlər. Lakin bu,mümkün olan məsələ deyil. İki ölkə arasında münasibətlər yüksələn xətlə inkişaf edir”.
Deputat Kamilə Əliyeva: “Bu gün bir qrup radikal Azərbaycanda hakimiyyətə gəlmək üçün normal demokratik yoldan istifadə etmək istəmir, anti-Azərbaycan qüvvələrdən alınan ianələr hesabına iğtişaşlar yaratmaq istəyirlər”.
