Avropa İnsan Hüquqları Məhkəməsi (AİHM) ötən həftə Azərbaycandan daha bir şikayət üzrə qərarını elan edib.
Bu, Respublikaçı Alternativ Partiyasının (ReAL) İdarə Heyətinin üzvü Natiq Cəfərlinin şikayəti ilə bağlıdır. Qərara görə, Azərbaycan hökuməti Natiq Cəfərliyə qarşı Avropa Konvensiyasının 3-cü (işgəncəyə məruz qalmamaq), 5-ci (azadlıq və toxunlumazlıq) və 18-ci (hüquqlarla bağlı məhdudiyyətlərdən istifadənin hədləri) maddələrini pozub. Buna görə də hökumət ona 17 min avro təzminat ödəməli olacaq.
Şikayət nədir: Bu şikayət 2014-cü ildə N.Cəfərliyə cinayət işi açılması, onun hüquq-mühafizə orqanlarında sorğu-sual edilməsi və 2016-cı il avqustunda həbs olunması ilə bağlıdır.
Həmin vaxt N.Cəfərli qanunsuz sahibkarlıq və başqa əməllərdə ittiham edilib. N.Cəfərli 2016-cı il sentyabrın 9-na kimi həbsdə saxlanıb və prokurorun müraciəti əsasında azadlığa buraxılıb.
Bəs indiyədək AİHM şəxslərin siyasi motivlərlə təqibini qadağan edən 18-ci maddənin pozuntusu üzrə Azərbaycanda kimlərin şikayətini tanıyıb?
İlqar Məmmədov (ReAL sədri)
İlqar Məmmədov 2013-cü ilin yanvarında İsmayıllı hadisələri ilə əlaqədar kütləvi iğtişaşların təşkilində ittiham olunaraq, 7 il azadlıqdan məhrum edilib.
2018-ci il avqustun 13-də Şəki Apelyasiya Məhkəməsi İ.Məmmədova 2 il sınaq müddəti ilə şərti cəza kəsməklə, onu məhkəmə zalından azadlığa buraxıb.
Rəsul Cəfərov (ReAL üzvü)
R.Cəfərov 2014-cü il avqustun 2-də həbs olunub. Mənimsəmə, qanunsuz sahibkarlıq, vergidən yayınma kimi əməllərdə suçlanan hüquq müdafiəçisinə Bakı Ağır Cinayətlər Məhkəməsi 6 il 6 aylıq həbs cəzası kəsib. Hökmdə müəyyən edilən vergini ödədiyinə görə sonradan Bakı Apelyasiya Məhkəməsi bu cəzanı 3 ay azaldıb.
Rəsul Cəfərov 2016-cı il martın 17-də əfv sərəncamı ilə azadlığa buraxılıb.
Zaur Qurbanlı (Keçmiş NİDA üzvü , hazırda ReAl üzvü)
2013-cü ilin aprelində saxlanılan Zaur Qurbanlı Bakı Ağır Cinayətlər Məhkəməsinin hökmü ilə 8 il azadlıqdan məhrum edilib. O, xuliqanlıqda, narkotik vasitələri qanunsuz saxlama, kütləvi iğtişaşları təşkiletmə və ya belə iğtişaşlara qatılmaqda ittiham olunurdu.
Z.Qurbanlı 2014-cü ilin dekabrında əfv sərəncamı ilə azadlığa buraxılıb.
İntiqam Əliyev (Hüquq Maarifçiliyi Cəmiyyətinin sədri)
İ.Əliyev 2014-cü ilin avqustunda həbs edilib . Mənimsəmə, vergidən yayınma kimi ittihamlar ilə 7 il 6 ay müddətinə azadlıqadan məhrum edilib.
2016-cı il martın 28-də Ali Məhkəmə İ.Əliyev barəsində real cəza müddətini şərti cəza ilə əvəzləyərək onu həbsdən azad edib.
Anar Məmmədli (SMDT sədri)
A.Məmmədli 2013-cü il dekabrın 16-da həbs olunub. Qanunsuz sahibkarlıq fəaliyyəti ilə məşğul olmaqda, vergidən yayınmada, vəzifə səlahiyyətlərindən sui-istifadədə təqsirli bilinib, 5 il 6 ay azadlıqdan məhrum edilib.
O, 2016-cı ildə əfv fərmanıyla azadlığa buraxılıb.
Rəşad Həsənov (Keçmiş NİDA üzvü)
NİDA Vətəndaş Hərəkatının keçmiş üzvü R.Həsənov 2013-cü ilin aprelində həbs edilmişdi. O, digər 7 NİDA üzvü ilə birgə xuliqanlıqda, narkotik vasitələri qanunsuz saxlama, kütləvi iğtişaşları təşkiletmə və ya belə iğtişaşlara qatılmaqda ittiham olunaraq 7 il 6 ay azadlıqdan məhrum edilib.
R.Həsənov 2016-cı ilin martında əfv sərəncamı ilə azadlığa buraxılıb.
Üzeyir Məmmədli (Keçmiş NİDA üzvü)
Ü.Məmmədli 2013-cü ilin martında həbs olunub. Onun da ittiham olunduğu maddələr xuliqanlıq, narkotik vasitələri qanunsuz saxlama, kütləvi iğtişaşları təşkiletmə və ya belə iğtişaşlara qatılmaq olub və buna görə 7 il müddətinə azadlıqdan məhrum edilib.
2014-cü ilin dekabrında əfv sərəncamı ilə azadlığa buraxılıb.
Rəşadət Axundov (Keçmiş NİDA üzvü)
Rəşadət Axundov 2013-cü ilin martında həbs olunub. 8 il müddətinə azadlıqdan məhrum edilib.
R.Axundov 2017-ci ilin martında əfv sərəncamı ilə azadlığa buraxılıb.
