Jurnalistləri Müdafiə Komitəsi (Committee to Protect Journalists – CPJ) dekabrın 11-də hansı ölkədə neçə jurnalistin həbsdə olduğu barədə məlumatların yer aldığı hesabatını açıqlayıb.
Həmin hesabata görə, 48 jurnalistin həbsdə olduğu Çin siyahıda birinci, 47 məhbus jurnalistlə Türkiyə isə ikinci yerdədir.
Üçüncü yeri 26 jurnalisti azadlıqdan məhrum etməklə Səudiyyə Ərəbistan və Misir bölüşüb.
Təşkilat Azərbaycanda 6 jurnalistin həbs edildiyini yazıb.
Qonşu ölkələr hansı yerdədir: Hesabata görə, Rusiyada 7, İranda 11 jurnalist azadlıqdan məhrum edilib. Rusiyadakı jurnalistlər Krımda fəaliyyət göstərməkdə ittiham olunaraq həbs olunub.
Dünyada cəmi neçə jurnalist həbsdədir: CPJ-nin araşdırmasına görə, bu il dünyada 250 jurnalist həbs olunub. 2018-ci ildə isə bu rəqəm 255 idi.
Jurnalistlər harada həbs olunub: Həbs olunanların 98%-i öz ölkələrində fəaliyyət göstərirdi. Xarici vətəndaş olan 4 məhbus jurnalistdən 3-cü Səudiyyə Ərəbistanında, 1-i isə Çindədir.
250 məhbus jurnalistin 8%-i qadındır. Ötən il bu göstərici 13% idi.
Niyə həbs olunublar: Jurnalistlərin həbsinin əsas səbəbinin siyasət, insan hüquqları, korrupsiya kimi mövzular olduğu bildirilir. Dünyada həbsdə olan jurnalistlərin çoxu onlayn mediada çalışanlardır.
