“Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov Bakıda əvvəllər mövcud olan tramvay xətlərinin sökülməsinin ölkəyə ziyan vurduğunu deyib və tramvay xətlərinin bərpa ediləcəyi barədə danışıb.
“Xarici şirkətlərə müraciət etmişik. Biznes-plan hazırlanır. Tramvay xətləri Bakının Əhmədli və Biləcəri, Abşeron rayonun Pirşağı, Sumqayıt şəhərinin Hacı Zeynalabdin Tağıyev kimi qəsəbələrini əhatə edəcək”.
Ümumiyyətlə Bakıda tramvaylar niyə söküldü?
Bakıda tramvay xətləri intensiv şəkildə zamanla azaldıldı. 1990-cı ildə tramvay yollarının uzunluğu 46,6 km, 1999-cu ildə 35,9 km, 2003-cü ildə isə 22,0 km olub.
Metronun “Xətai” stansiyasından Montin bazarına qədər uzanan sonuncu tramvay xətti 2004-cü ildə sökülüb. Şəhər rəhbərliyi bunu Mərkəzi Bankın yanında yenicə istifadəyə verilən göydələnin silkələnməsi ilə əsaslandırdı. Həmin vaxt tramvay ən ucuz nəqliyyat vasitəsi idi və hazırkı məzənnə ilə gediş haqqı 5 qəpik idi. Amma sökülmənin səbəbi təhlükəsizliklə əsaslandırıldığından bu, sərnişinlər arasında etiraza səbəb olmadı. O dövrdə metroda və avtobuslarda gediş haqqı 10 qəpik, bəzi avtobuslarda isə 20 qəpik idi.
Sonralar paytaxtın mərkəzində, metronun “Gənclik” stansiyasının yaxınlığında yerləşən tramvay parkının yerində göydələnlər inşa edildi.
Bakıda son tramvay xətlərinin kəsilməsi isə İlham Əliyevin prezidentliyinin ilk ilinə, 2004-cü ilə təsadüf edir.
Tramvay xətlərinin bərpası nə vaxt gündəmə gəlməyə başladı?
2012-ci ilin fevral ayından Azərbaycan hökuməti Bakıda tramvay xəttinin bərpa ediləcəyini açıqlayır.
Bir az da tramvayın iqtisadi və ekoloji faydaları barədə
Tramvay sisteminin yaradılması metro tikintisindən dəfələrlə ucuzdur:
1 km metro xətti – 50-100 milyon dollara
1 km tramvay xətti – 10-30 milyon dollara başa gəlir.
Tramvayın istismarı avtobusun istismarından xeyli ucuz başa gəlir
Əgər orta ölçülü şəhərdə avtobus saatda 4 mindən artıq sərnişin daşıyırsa, tramvay 7 min sərnişini daşımaq iqtidarındadır
Günün sıxlıq çox olan saatlarında tramvaya əlavə vaqonlar qoşmaq olur
Tramvayın istismar müddəti 40 ildən artıqdır
Tramvaylar havanı çirkləndirmir, ətraf mühitə mənfi təsir göstərmir
