ATƏT-in Demokratik Təsisatlar və İnsan Haqları Bürosu (DTİHB) fevralın 9-da keçiriləcək parlament seçkiləri ilə əlaqədar Azərbaycana qiymətləndirmə missiyası göndərəcək.
1995-ci ildən bəri Azərbaycanda keçirilən demək olar ki, bütün seçkiləri müşahidə edən ATƏT-in Demokratik Təsisatlar və İnsan hüquqları Bürosunun müşahidə edə bilmədiyi seçki də olub. Bu, 2015-ci il noyabrın 1-də keçirilən parlament seçkiləri idi. Həmin vaxt qurum Azərbaycandakı seçkiləri izləmək üçün 30 uzunmüddətli və 350 qısamüddətli müşahidəçi göndərmək istəyib.
Azərbaycan Xarici İşlər Nazirliyi bu istəyə belə cavab verib:
9.5 milyon əhalisi və 125 seçki dairəsi olan Azərbaycana bu qədər müşahidəçi göndərmək istəyi heç bir məntiqə sığmır.
Azərbaycanın tətbiq etdiyi məhdudiyyətlərə görə, DTİHB seçkiləri müşahidə etməyəcəyi barədə qərarını açıqlayıb.
DTİHB-nin 2003-cü ildən bəri keçirilən seçkilərlə bağlı yekun hesabatlarında nə yazılıb?
15 oktyabr, 2003-cü il. Prezident Seçkiləri.
Seçkilər ATƏT-in öhdəliklərinə və demokratik seçkilər üzrə beynəlxalq normaların tələblərinə cavab verə bilməyib, ümumi proses parlaq seçki preosesinin həyata keçirilməsi üçün lazımınca siyasi öhdəliyin olmamasını əks etdirib.
6 noyabr, 2005-ci il. Parlament Seçkiləri
Səslərin sayılması zamanı və nəticələrin dairə seçki komissiyalarında cədvəlləşdiriləsi zamanı ciddi pozuntular müşahidə olundu.
MSK seçki günü və seçkidən sonra daxil olan 1000-dən çox şikayətə çevik çəkildə və şəffaf baxmadı. 125 dairədən 10-da seçkinin nəticələri ləğv edildi, təkrar seçkilərin keçirilməsi 13 may 2006-cı ilə təyin olundu.
13 may, 2006-cı il. Təkrar Parlament Seçkiləri
DTİHB seçki prosesini sistematik şəkildə müşahidə etməsə də, ümumilikdə səsvermənin sakit keçirildiyini qeyd edib. Bununla yanaşı, hesablama aparılması zamanı pozuntuları qeydə aldığını bəyan edib.
15 oktyabr, 2008-ci il. Prezident Seçkiləri
Seçkilər dinc mühitdə keçib, lakin sağlam rəqabətin çatışmaması, kifayət qədər fəal siyasi müzakirələrin olmaması, eləcə də məhdud media mühiti ilə xarakterizə olunub və beləliklə, mənalı və plüralist demokratik seçkilər üçün zəruri olan prinsiplərin bəzilərini əks etdirməyib.
7 noyabr, 2010-cu il. Parlament Seçkiləri
150 səsvermə məntəqəsinin üçdə birində pozuntu müşahidə edilib, səslərin sayılması prosesi bir sıra yerlərdə topa bülletenlərin atılması kimi problemləri də nəzərə almaqla pis və yaxud çox pis olaraq qiymətləndirilib.
9 oktyabr, 2013-cü il. Prezident Seçkiləri
Səslərin hesablanması xeyli dərəcədə mənfi hallarla səciyyələnib, müşahidə olunan seçki məntəqələrinin 58 faizində pis və yaxud çox pis kimi dəyərləndirilib və ciddi problemlərin olduğu qeyd edilib.
11 aprel, 2018- ci il. Prezident Seçkiləri
Azərbaycandakı seçkilərin azadlıqların məhdudlaşdırılması şəraitində keçirildiyi bildirilib. Hesabatda vurğulanıb ki, onların müşahidəçiləri seçki günü topa bülletenlərin qutulara atılmasının şahidi olublar.
