Mərkəzi Seçki Komissiyasının bu gün keçirilən iclasında fevralın 9-da keçirilən seçkilərlə bağlı müraciətlərə baxılıb. İclasda 80 saylı İmişli-Beyləqan seçki dairəsindən deputatlığa namizədlər – Hikmət Şirinov və Razim Əmiraslanovun müraciəti də müzakirə olunub.
Ekspert qrupu belə bir nəticəyə gəlib ki, dairə üzrə seçkilər etibarsız hesab edilməli, Seçki Məcəlləsinin müvafiq maddələrinə uyğun olaraq, fevralın 9-da keçirilən seçkilərdə namizədlərin MSK-ya müraciətləri təmin edilməlidir.
Hansı pozuntular aşkarlanıb: MSK deyir ki, aktların araşdırılması zamanı məlum olub ki;
- seçki bülletenləri əvvəlcədən kəsilib
- komissiya müşahidəçilərin səsvermənin hesablanmasında iştirakına mane olub,
- bəzi məntəqələrdə pozuntular aşkarlanıb.
- sosial şəbəkələrdə bu dairədə olan pozuntularla bağlı görüntülər paylaşılıb
- bəzi namizədlərə güzəştlərin olması halları da müəyyən edilib.
Həmin dairədə kimlər namizəd idi: Adı çəkilən dairədə MSK-nın ilki nəticələrinə görə Çingiz Qənizadə qalib elan olunmuşdu. Onunla yanaşı Müsavat Partiyasının başqan müavini Razi Əmiraslanov, keçmiş deputat Xanhüseyn Kazımlının qızı Əsli Kazımova və yazıçı Qəşəm Nəcəfzadənin oğlu Kəramət Böyükçöl də eyni dairədən namizəd olub.
Digər namizədlər: Müşfiq Əliyev (müstəqil), Sahib Əliyev (müstəqil), Elməddin Həbibli (müstəqil), Rəşad Hüseynov (müstəqil), Arif Ləzimzadə (müstəqil), Raqif Muradov (müstəqil), Kəramət Nəcəfov (müstəqil), Məhərrəm Orucov (müstəqil), Əbülfət Paşayev (müstəqil), Vəsimə Qarayeva (müstəqil), Elmin Sadıqov (müstəqil), Hikmət Şirinov (müstəqil)
