Mərkəzi Seçki Komissiyasının bugünkü iclasında daha bir dairə – 35 saylı Xətai 3-cü seçki dairəsinin nəticələri ləğv olunub. Komissiyanın iclasında həmin dairədən deputatlığa namizəd İqbal Ağazadə və səlahiyyətli nümayəndəsi Rafael Tağızadənin müraciətinə baxılıb.
Report yazır ki, MSK üzvü Ramiz İbrahimov sosial şəbəkələrdə yayılan görüntüləri araşdıran ekspert qrupu qanunvericiliyin pozulduğu qənaətinə gəlib.
“2 seçki məntəqəsində seçki komissiyasında protokol verilməyib. Bir çox məntəqələrdə bu cür pozuntulara yol verilib. Bu hallar da onu göstərir ki, seçicilərin həqiqi iradəsini müəyyənləşdirməyə imkan verilməyib. Protokolların hansının düzgün olması qeyri-mümkündür. Dairənin 33 məntəqəsinin 30-da belə hallar müəyyən edilib. Hesab edirəm ki, səsvermənin nəticələri etibarsız sayılmalıdır”
MSK üzvü Ramiz İbrahimov
Kimlər namizəd idi: 35 saylı Xətai 3-cü seçki dairəsindən 12 nəfərin deputatlığa namizədliyi qeydə alınıb. Onlar arasında “Yeni Müsavat” qəzetinin baş redaktoru Rauf Arifoğlu və Ümid Partiyasının sədri İqbal Ağazadə var idi.
