“Oxuduğum 244 nömrəli tam orta məktəbdə artıq illərdir biseksual olduğuma görə bullinq, ayrı-seçkilik, zorakılıq görürəm”.
Bu sözləri 16 yaşlı Əli Məlikov öz facebook hesabında yazıb.
Onun sözlərinə görə, məktəb direktoru və müavininə dəfələrlə şikayət etsə də, faydası olmur.
Mənə qarşı psixoloji və fiziki təzyiqlər 8-ci sinifdən başlayıb. Həmin ərəfələrdə məktəbdəki bir neçə uşaq cinsi oriyentasiyam haqda məlumat əldə etdi. Daha sonra məktəbin dəhlizində mənə “petux”, “qızbibi” kimi sözlər atmağa başladılar. O dövrdə oxuduğum məktəblə paralel məktəbdəki bir neçə zorakı uşaq əlbir olub məni yolda gedərkən küncə sıxışdırdılar. Üstümə it cumdururdular. Həmin uşaqların cibində bıçaq da var idi. Yaxşı ki, o zaman dostum yanımda idi, yoxsa aqibətim bəlli deyildi. Bir qrup məktəbli sosial mediada şəkillərimi yayıb haqqımda nalayiq ifadələr işlədirdilər.
Əli Məlikov
Məlikov deyir ki, bu il ərzində onun çantasındakı müxtəlif şəkilli pinlərə, istifadə etdiyi üzərində LGBT bayrağını əks etdirən maskaya görə nəinki məktəblilər tərəfindən hətta təhsil işçiləri tərəfindən iradlar, təhqirlər edilib.
Mənə “petux” deyən oğlanlar elə “Məktəblinin dostu” layihəsinin işçisinin yanında üstümə qışqırıb yenidən həmin ifafəni işlədirdilər. Hadisə barədə direktor Yəhya Abbasova da məlumat verdim. Hətta 3-4 dəfə valideynim də gəlib. Direktor isə dəfələrlə onun qəbuluna gəlməyimə rəğmən məsələyə etinasız yanaşıb.
Əli Məlikov
Şikayətçinin sözlərinə görə, həyatının təhlükə altında olması ilə bağlı Daxili İşlər Nazirliyinə də müraciət edib. Noyabrın 26-ı Binəqədi rayonunda yerləşən 5 nömrəli polis bölməsinə dəvət olunub.
Məsələ ilə bağlı bir qrup jurnalist sözügedən məktəbə gedib. “Məktəblinin dostu” layihəsinin işçisi Hüseynağa Hüseynov deyib ki, şagird Əli Məlikovla dəfələrlə söhbətlər aparıb və onun şikayətçi olduğu şagirdlər tənbeh edilib.
Biz məktəbin hər bir şagirdinə fərdi yaxınlaşıb deyə bilmərik ki, Əliyə sataşmayın. Əli hansı şagirddən şikayətçi olubsa o uşaqlarla söhbətlər etmişik. Əli tələb edir ki, ona sataşan uşaqları məktəbdən uzaqlaşdıraq. Qanunvericilikdə belə bir qanun yoxdur. Mən Əliyə də demişəm ki, məktəbdə özünə senzura tətbiq etsin. Əli isə öz maskasını ( LGBT bayrağı əks edilən) çıxarıb mənə dedi ki, əgər bunu taxmıramsa deməli, yetəri qədər özümə senzura qoymuşam. Düşünürəm, Əli hələki uşaqdır, o müəyyən qrupların təsiri altına düşüb.
Hüseynağa Hüseynov
Məsələ ilə bağlı Azərbaycanın insan haqları üzrə müvəkkilinin (Ombudsman) sözçüsü Emil Şahzadə Mikroskop mediaya verdiyi açıqlamasında deyib ki, şikayətçi quruma rəsmi müraciət etməyib. Rəsmi müraciət sistemdə əks edildiyi vaxtdan etibarən məsələ araşdırılacaq.
Sistemdə hələki vətəndaşın adı və müraciəti yoxdur. Nə 916 çağrı mərkəzi ilə əlaqə saxlanılıb, nə də saytımızda qeyd olunan ünvanımıza müraciət edilib. Sadəcə öz “facebook” hesabında yazdığı postda səhifəmizi işarələyib. Bu isə rəsmi müraciət deyil. Bəlkə o düşünür ki, bu rəsmi müraciətdir. Amma vətəndaş rəsmi müraciət qaydasını bilmirsə bizimlə əlaqə saxlayıb ətraflı məlumat ala bilər. Amma biz yenə də Səbinə xanıma məlumat vermişik. Məsələ ombudsmanın diqqətindədir.
Emil Şahzadə
Ailə, Qadın və Uşaq komitəsinin sözçüsü Elgün Səfərovun isə sözlərinə görə, məsələ araşdırılır.
