ArmNews telekanalı və radiosunun, eyni zamanda Tert.am xəbər saytının daxil olduğu “Karyak” Media Holdinq fevralın 10-da verdiyi açıqlamada Ermənistandakı fəaliyyətlərini dayandıracaqlarını bildirib. Açıqlamaya görə, holdinqin bu qərarının səbəbi maliyyə çətinlikləri ilə bağlıdır. Media qrupunun məlumatında o da qeyd olunub ki, bu günə qədər onlar əməkdaşlıqla bağlı çoxlu siyasi təklif alıb.
Ancaq bu, bizim prinsiplərimizə zidd olduğundan əməkdaşlıqdan imtina etdik
media qrupunun rəsmisi bildirib.
O həm də qeyd edib ki, bir sıra kommersiya təklifləri alsalar da media qrupunun informasiya siyasətini davam etdirməyə imkan verən təklif heç vaxt olmayıb.
Nəticə etibarilə təəssüfləndirci, amma olduqca təbii qərar verdik; Karyak Media qrupu fəaliyyətini dayandırır.
Karyak Media-nı kim qurub: Karyak Media qrupunun təsisçiləri Ermənistanın daha öncə iqtidarda olan Respublika Partiyasından olan dörd keçmiş deputat – Arman Saqatelyan, Karen Bekaryan, Mihran Akopyan və Samvel Farmanyandır.
Media qrupu özünün müxtəlif holdinqləri vasitəsilə mütəmadi olaraq Ermənistanda inqilabdan sonra hakimiyyətə gəlmiş hökumət ilə bağlı, xüsusilə də İkinci Dağlıq Qarabağ müharibəsində Ermənistanın məğlubiyyəti barədə sərt tənqidlər yayımlayıb.
Nə qədər etibarlı mediadır: Bu yaxınlarda Beynəlxalq Respublikaçılar İnstitutu tərəfindən keçirilən ictimai sorğunun nəticələrinə görə, ArmNews “xarici siyasətlə bağlı məlumatları” yayan ən etibarlı media qurumları arasında beşinci yeri tutub və respondentlərin 5%-i bu medianı ən yaxşı seçim kimi qiymətləndirib.
