Azərbaycan Ermənistanın sabiq prezidentləri Robert Koçaryan və Serj Sarqsyanı Cinayət Məcəlləsinin müvafiq maddələri ilə cinayət məsuliyyətinə cəlb edərək axtarışa verib. Bu haqda APA-ya Respublika Hərbi Prokurorluğunun Xüsusi istintaq şöbəsinin rəisi, baş ədliyyə müşaviri Emil Tağıyev danışıb.
Eks-prezidentlər nədə ittiham olunur:
- 1988-ci ilin fevralından etibarən Azərbaycan və erməni xalqları arasında milli düşmənçilik salmaq, nifrət oyatmaq niyyəti ilə Xankəndi şəhərinin təşkilat və müəssisələrində erməni milliyyətindən olan işçiləri yığıb iclaslar keçiriblər;
- Qarabağın ermənilərə məxsus olduğunu və orada yalnız ermənilərin yaşamalı olduğunu, azərbaycanlıları işdən qovmağı, şəhərdən və Dağlıq Qarabağdan zorla köçürməyi, evlərini yandırmağı təbliğ ediblər;
- Azərbaycan Konstitusiyasına zidd olaraq 02 sentyabr 1991-ci ildə keçmiş Şaumyan rayonu da birləşdirilməklə, “Dağlıq Qarabağ Respublikası”nı elan ediblər;
- Bütün hakimiyyəti vilayət xalq deputatları sovetliyinə və onun icraiyyə komitəsinə verib, həmin ərazidə Azərbaycan Respublikası Konstitusiyasının və Qanunlarının qüvvədən düşməsi barədə qanunsuz qərar qəbul ediblər.
Emil Tağıyev bildirib ki, hər iki sabiq prezident qeyd edilənlər və digər cinayətləri törətdiklərinə görə Cinayət Məcəlləsinin müvafiq maddələri ilə cinayət məsuliyyətinə cəlb edilib və axtarışa veriliblər.
