Gürcüstanın müxalif “Mtavari” telekanalının təsisçisi və direktoru, həmçinin hazırda həbsdə olan Mixail Saakaşvilinin vəkillərindən biri olan Nika Qvaramiya həbs edilib. OC Medianın məlumatına görə, vəzifə səlahiyyətlərindən sui-istifadə etməklə ittiham olunan Qvaramiya Tbilisi Şəhər Məhkəməsinin qərarına əsasən, 3 il 6 ay müddətinə azadlıqdan məhrum edilib.
Hansı ittihamlar irəli sürülüb: N. Qvaramiya 2020-ci ildə Gürcüstanın “Rustavi 2” kanalının meneceri olarkən törətdiyi iddia edilən cinayətə görə mühakimə olunub. Belə ki, ona qarşı vəzifə səlahiyyətlərindən sui-istifadə etmə, əmlakı mənimsəmə, kommersiya rüşvətxorluğu və sənəd işində saxtakarlığa yol vermə ittihamları irəli sürülüb. Adıçəkilən son 3 ittiham üzrə aparılan məhkəmə işinin nəticəsində Qvaramiya təqsirsiz hesab edilib.
Qvaramiyanın həbsinə reaksiyalar
- Gürcüstanın Ombudsmanı məhkəməyə Qvaramiyanı cinayət və ya ictimai məsuliyyətə cəlb etmək üçün heç bir əsas olmadığını deyib.
- “Transparency İnternational” təşkilatının Gürcüstan bürosu məlumat yayaraq həbs qərarını siyasi motiv hesab edib. Məhkəmə işinin hökuməti tənqid edənlərə qarşı “siyasi təqib” kampaniyasının davamı və “digər azad media orqanlarına açıq mesaj göndərmək” olduğunu vurğulayıb.
Nika Qvaramiya kimdir: Gürcüstanda Vahid Milli Hərəkat partiyasının üzvü olmasa da, onların hakimiyyəti dövrdə bir sıra yüksək vəzifələrdə çalışıb, partiyanın əsas tərəfdarlarından biri olub. O, həmçinin məhkəmədə Gürcüstanın keçmiş prezidenti Mixail Saakaşvilini qanuni şəkildə təmsil edib.
