Dövlət Təhlükəsizlik Xidməti Azərbaycan vətəndaşını ölkə xaricində silahlı birləşmələrdə fəaliyyət göstərmək şübhəsi ilə həbs edib. Bu haqda qurumun rəsmi saytında məlumat yayılıb:
Azərbaycan vətəndaşı, 1977-ci il təvəllüdlü Osmanov Akif Aydın oğlunun dini düşmənçilik zəminində ölkə hüdudlarından kənarda terror aktlarının törədildiyi silahlı münaqişələrdə iştirakına əsaslı şübhələr olub. Onun Suriyanın Atma şəhərində xüsusi hazırlıq düşərgəsində təlimlər keçərək odlu silah və partlayıcı maddələrdən istifadə qaydalarını mənimsəməklə “Azəri Camaatı” adlı silahlı qruplaşmanın fəaliyyətində iştirak etməsi, qrup üzvləri ilə birlikdə “Şeyx Süleyman” qəsəbəsi uğrunda gedən döyüşlərə qoşulduğu müəyyən edilib.
deyilir açıqlamada
DTX-nin digər iddiası nədir: Akif Osmanovun başqa ölkələrin ərazisində sərbəst hərəkət edib cinayət məsuliyyətindən yayına bilməsi üçün ona Özbəkistan vətəndaşının adına saxta pasport verilib. O, həmin pasportla müxtəlif ölkələrdə olub.
Hansı maddə ilə ittiham olunur: Akif Osmanov Cinayət Məcəlləsinin 12.1, 279.1-ci (Azərbaycan Respublikasının qanunvericiliyi ilə nəzərdə tutulmayan silahlı birləşmələr və ya qruplar yaratma, eləcə də onların yaradılmasında və fəaliyyətində iştirak etmə, onları silahla, döyüş sursatı ilə, partlayıcı maddələrlə, hərbi texnika ilə, yaxud əsgəri ləvazimatla təchiz etmə) maddələri ilə cinayət məsuliyyətinə cəlb olunub. Onun barəsində məhkəmənin qərarı ilə həbs qətimkan tədbiri seçilib.
