Ermənistana qarşı 44 günlük müharibədə iştirak edən əsgər və hərbçilərdən daha 7 min nəfərinə “müharibə veteranı” adı verilib. Bu haqda Müdafiə Nazirliyinin rəsmi feysbuk səhifəsində məlumat yayılıb:
Müdafiə Nazirliyinin tərkibində fəaliyyət göstərən komissiya tərəfindən 7000 nəfərdən artıq vətəndaşın Vətən müharibəsində iştirakı ilə bağlı məlumatlarının araşdırılması yekunlaşdırılaraq sənədləri “Müharibə veteranı” adının verilməsi məqsədilə qərar qəbul edilməsi üçün müvafiq komissiyaya göndərilib.
deyə qeyd olunub
Açıqlamada başqa nə deyilib: “Müharibə veteranı” statusuna namizədlər haqda qərar qəbul edildikdən sonra adları “Zəfər” altsisteminə daxil ediləcək. Onlara 80 manat aylıq təqaüd təyin ediləcək və 2022-ci ilin yanvarın 1-dən hesablanaraq ödəniləcək.
Qazilərin həll olmayan problemi: Qazilər müharibə bitəndən bəri müxtəlif vaxtlarda aksiyalar ediblər. Son olaraq iyun ayının 2-də bir qrup veteran Əmək və Əhalinin Sosial Müdafiəsi Nazirliyi qarşısında etiraz aksiyası keçirib, əlillik və sosial yardımların verilməməsinə etiraz ediblər. Veteranlar nazir Sahil Babayevin onların qarşısına çıxmasını və problemlərini həll etməsini tələb ediblər.
