Yaponiyanın keçmiş baş naziri Şinzo Abe iyulun 8-də Nara şəhərində seçki təbliğatı üçün çıxış edərkən sui-qəsdə məruz qalıb. Helikopterlə xəstəxanaya çatdırılan Abenin həyatını xilas etmək mümkün olmayıb.
Sui-qəsd haqda nələri bilirik: Nara şəhərində izdiham önündə qarşıdan gələn parlament seçkisi üçün təbliğat çıxışı edən Abe iki dəfə güllə atəşinə məruz qalıb. Yaponiya mediasının kadrlarına əks olunan görüntülərdə Abenin ikinci atəşdən sonra yerə yıxıldığı görünür. Xəstəxana həkiminin yerli mediaya dediyinə görə, keçmiş baş nazir sui-qəsddən 5 saat yarım sonra, ağır qanaxmadan vəfat edib.
Atəş səslərindən sonra Abenin mühafizəçilərinin orta yaşlı, tibbi maska taxmış kişini yerə yıxıb saxladığı görünüb. Polis saxlanılan şəxsin 41 yaşlı Nara sakini Tetsuya Yamagami olduğunu, silahın isə ev şəraitində hazırlandığını müəyyən edib. Hələlik hadisənin motivləri barədə açıqlama yoxdur.
Şinzo Abe kimdir: 67 yaşlı Abe 2020-ci ildə baş nazir postundan istefa verib. O, Yaponiyanın ən uzun müddət hakimiyyətdə olmuş baş naziri hesab olunur. Abe iqtisadi cəhətdən mühafizəkar və ölkəni hərbiləşdirməyə meyilli siyasəti ilə tanınıb. Son həftələrdəki çıxışlarında o, Rusiyanın Ukraynanı işğalını əsas gətirərək, Yaponiyanın müdafiə büdcəsini artırmağı təklif edib.
