Sentyabrın 12-dən etibarən Azərbaycanla Ermənistan sərhədində vəziyyət yenidən gərginləşib və hər iki tərəf itkilər barədə rəsmi məlumat açıqlayıb. Azərbaycan Müdafiə Nazirliyinin 15 sentyabrda yaydığı siyahıya görə, 71 hərbçi döyüşlər zamanı həlak olub. Ermənistan Müdafiə Nazirliyinin məlumatına görə, 105 erməni hərbçi döyüşlərdə həyatını itirib.
Ermənistanın Baş naziri Nikol Paşinyan ötən gün yaydığı bəyanatda sülhə hazır olduğunu açıqlayıb. OC Media yazır ki, Paşinyan “əgər Azərbaycan Ermənistanın SSRİ dövründə təsdiqlənmiş ərazi bütövlüyünü tanımağa hazırdırsa, o da eynisini etməyə hazırdır”, deyib.
Baş nazirin dediyinə görə, 2021-ci ildə Azərbaycan Ermənistanın 40 kvadrat kilometr ərazisini ələ keçirib və hazırda davam edən döyüşlərdə daha 10 kvadrat kilometr ərazi nəzarətə götürülüb.
“Hətta bizi tənqid etsələr də, söysə də və vətən xaini adlandırsa da biz sənəd imzalamaq istəyirik. Bəlkə də insanlar bizi hakimiyyətdən devirmək istəyəcəklər… Nəticədə Ermənistan Respublikası öz sərhədləri daxilində dayanıqlı sülh və təhlüksəziliyə nail olacaq”.
Sülh əvəzinə, istefa tələbi ilə aksiyalar
Paşinyanın bu bəyanatı Dağlıq Qarabağın Azərbaycan ərazisi kimi tanımağa hazır olduğu deməkdir. Buna etiraz edən və razılaşmayan Ermənistan vətəndaşları ötən gecədən etibarən paytaxt Yerevanda aksiyalar keçirib.
Min nəfərə yaxın narazı vətəndaş ötən gecə hökumət və parlament binaları qarşısında toplaşıb və hökuməti istefaya çağırıb. Aksiyalar başlayandan qısa müddət sonra Ermənistan parlamentinin sözçüsü Alen Simonyan Facebook sosial şəbəkəsində canlı yayım vasitəsilə çıxış edib. O, Paşinyanın bəyanatını aydınlaşdırıb və bildirib ki, Dağlıq Qarabağ Ermənistan üçün ərazi məsələsi yox, hüquq məsələsidir. O, xalqların öz müqəddəratını təyin etmək hüququnun da buna daxil olduğunu əlavə edib.
İmzalamaq üçün hazır sənəd yoxdur
Sentyabrın 14-ü gecə saatlarında Nikol Paşinyan Facebook vasitəsilə canlı yayımda yenidən bəyanatının detallarına aydınlıq gətirib. O deyib ki, hazırda müqavilə imzalanmağa hazırlıq barədə yayılan məlumatlar həqiqətə uyğun deyil.
Yaydığı bəyanatın detallarını izah edən və aydınlaşdıran Baş nazir vurğulayıb ki, hazırda imzalanmaq üçün hər hansı hazır sənəd yoxdur. Onun bəyanatında demək istədiyi bu olub ki, Ermənistanın hərtərəfli həllə hazırdır.
Paşinyan həm də Dağlıq Qarabağ və oradakı erməni əsilli əhalinin taleyi barədə də danışıb və deyib ki, bu, Ermənistanın sülh danışıqlarında qaldırdığı məsələlərdən olub.
İstəmirəm ki, bir dəqiqəlik belə olsa düşünəsiz ki, biz dövlət əleyhinə nəsə edəcəyik.
Paşinyan deyib.
Hökumət əleyhinə aksiyalar Yerevanla yanaşı Gümrü və Xankəndidə də davam edib. Aksiya iştirakçıları hakim partiyanı təhdid edib və onlara parlamentə gəlmək üçün vaxt verib. Bildirilib ki, əks təqdirdə onların hamısının arxasına düşəcəklər.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiz.
